Klêi châ Khu xiâm ngăn pơkeăng ăm phêp tê xuá mâu túa pơkeăng pơlât pơreăng COVID-19, malối cho pơkeăng Molnupiravir châ xing xoăng tê tung lâp tơnêi têa. La ga, tiô hnê tối dêi khu ngăn pơkeăng, tơdroăng xúa ôu pơkeăng pơlât COVID-19 thế xua ƀok thaí pơkeăng chêh inâi pơkeăng ăm, pôi tá hmôu pơ rôe xêh pơkeăng vâ ôu pơlât ah kô pro pá ôh tá ‘nâi hdrối.

Vâ hlê nhên tâ tơdroăng mê, Khu chêh hlá tơbeăng‘na tơdroăng kố hiăng trâm tơpui tơno ƀă ƀok thái pơkeăng Lại Quang Miễn, kăn phŏ pơkuâ ngăn tíu xiâm ngăn ‘na pơkeăng pơlê kong kơdrâm {uôn Ma Thuột .

-Ƀok thái pơkeăng tối ăm ‘nâi mâu ngế ki F0 ki lâi châ pơlât ƀă pơkeăng Molnupiravir?

Ƀok thái pơkeăng Lại Quang Miễn: Klêi châ Vi ƀan hnê ngăn kong pơlê Dak Lak ăm phep kong pơlê pơlât ƀă pơkeăng Molnupiravir ăm mâu ngế F0 ki pơlât a hngêi mê troh lơ 19/1/2022, Tíu xiâm ngăn pơkeăng hiăng mơjiâng pơkâ vâ pơlât F0 a hngêi ăm mâu ngế F0 ki pơlât a hngêi la ôh tá ăm ‘nâi châi râ ó lơ bú châi iâ tê. ‘Na hnê tối pơlât, má môi, pơkeăng pơlât ki mê ƀă kơnốu, kơdrâi 18 hơnăm tơngi klêi, ôh ăm ôu pơlât ƀă mâu ngế pa xôp 18 hơnăm. Kơdrâi dế mơ-êa kuăn lơ dế ăm kuăn âu xuân ôh tá chiâng ôu pơlât.

Ƀă mâu ngế ki ai tơdroăng châi xêh ki ê hdrối nah tơdroăng châi ôh tá tơniăn mê pin xuân ôh tá ăm ôu pơlât. Mâu ngế hên hơnăm, tung châ ai hên tơdroăng châi, lơ ai tơdroăng châi ‘na plâi nuih, êi kliâm, lơ châi kơkốu tiô rơnó xuân ôh tá chiâng ôu pơlât pơkeăng Molnupiravir.

-Tơdroăng kuăn pơlê hmôu pơ rôe ôu xêh pơkeăng Molnupiravir vâ pơlât COVID-19 mơ’nui ah kô ti lâi?

Ƀok thái pơkeăng Lại Quang Miễn: Tâng kuăn pơlê hmôu pơ rôe xêh pơkeăng mơdât virus vâ pơlât cho môi tơdroăng ki oh tá tro kân ‘nâng xua tung pơkeăng pơlât mê gá ai trếo ki mơdât virus Molnupiravir  hnê ôh tá chiâng xúa ôu ƀă hên ngế ki ôh tá ai ivá rơdêi. Tâng mâu ngế ki hiăng hnê tối oh tá chiâng xúa ôu, la xuân ối ôu pá vâ kâi prêi tơdroăng châi, thăm nếo tơdroăng châi thăm rế ó tâ.

Y hok hnê tối kố cho pơreăng tâ tú tiô nhóm A, cho khu pơreăng ki rơ-iô mê ngế ki xúa ôu pơkeăng hmê thế ai hlá đơn chêh dêi ƀok thái pơkeăng. Tâng hmôu pơ rôe ôu kô oh tá ‘nâi hdrối pơkeăng kô pro chiâng ti lâi, rơ-iô khât.

Riân troh nôkố, Tíu xiâm ngăn pơkeăng pơlât F0 a hngêi ăm dâng 19 rơpâu ngế, tung mê hiăng pơlât prêi ai 7 rơpâu 638 ngế, dế pơlât 10 rơpâu 415 ngế ƀă pơtroh pơlât troh râ kơpêng ai 43 ngế. Krê mâu F0 pơlât a hngêi ai ôu pơkeăng mơdât virus Molnupiravir mê ngin dế pơlât ăm 670 ngế. Ăm hlo tơdroăng pơlât hlo tơ-ƀrê, hâi hlo ai ngế ki lâi ôu pơkeăng mê chiâng rế râ ó lơ hlâ mơngế. Tâi tâng mâu ngế ki pơlât mê pơrá tơniăn.

-Tiah mê, ƀok thái pơkeăng ai hnê tối ki klâi ăm mâu ngế tâ COVID-19?

Ƀok thái pơkeăng Lại Quang Miễn: Nôkố, Khu xiâm ngăn pơkeăng hnê tối ăm tâi tâng kuăn pơlê ki tâ COVID-19 thế pôi tá préa, pôi tô tuăn, pôi tá xâu. Pêi pro krâu khât tro tiô pơkâ 5K vâ hbrâ mơdât pơreăng ăm dêi rơpŏng hngêi ƀă kuăn pơlê. Nôkố ngin dế mơjiâng 25 tíu khăm ki lăm pơlât ukố umê. Mâu kăn ƀô̆ dêi hngêi pơkeăng hiăng hnê ‘na pơlât ăm F0 a hngêi ƀă pơlât F0 ai xúa ôu pơkeăng kháng virus.

Xua mê, drêng tâ pơreăng, ngế ki tâ pơreăng lơ hngêi rơpŏng ngế ki mê thế lăm troh a hngêi pơkeăng chêh inâi tối tơbleăng tơná. Tâng ai tiô pơkâ, hngêi pơkeăng kô pơkâ pơlât F0 a hngêi. Klêi ai pơkâ pơlât F0 a hngêi mâu kăn ƀô̆ ngăn pơkeăng kô krếo đi đo ƀă mơngế ki châi tamo xuân krếo đi đo ƀă hngêi pơkeăng vâ ‘nâi tơdroăng, hnê, séa ngăn pơlât a hngêi, môi tiah: Khăm ngăn kơtêi, kêp nhiệt độ ki vâ ’nâi tơngê râ lơ ôh, mâu tơdroăng ăm ’nâi tung 2 rôh kơxo ƀă kơxê vâ tơbleăng ăm mâu ngế ngăn pơkeăng. Tâng lơ rế ó mê mâu ngăn pơkeăng kô troh ngăn teăm tơdrêng vâ hnê pơlât pơtối lơ chơ ăm pơlât a hngêi pơkeăng.

-Mơnê kơ tơdroăng hiăng hnê tối dêi ƀok thái pơkeăng!

Mỹ Hạnh-Quang Nhật chêh

Gương tơplôu ƀă tơbleăng