VOV4.Xơ Đăng - Hâi lơ 27/2, kơxô̆ mơngế tro tâ COVID-19 a kong pơlê Gia Lai roh apoăng tơkâ luâ 1.100 ngế/hâi. Khu râ kăn pơkuâ kong pơlê hiăng pơkâ ăm hok tro râ mâm non ƀă râ má môi a pơlê kong kơdrâm Pleiku châ pơtê pơtân tơdroăng hriâm a hngêi trung, vêh hriâm mơ’no tơdrêng tung um tiô troăng măng internet sap hâi lơ 28/2.

Mâu hngêi trung tơniăn tơdroăng hbrâ, mơdât pơreăng

Péa tíu ai kơxô̆ mơngế tro tâ hên má môi tung hâi lơ 27/2 cho pơlê kong kơdrâm Pleiku cho 356 ngế ƀă tơring Đăk Đoa 198 ngế. Khu hnê mơhno hbrâ, mơdât pơreăng COVID-19 kong pơlê Gia Lai mơnhên, nôkố, hên ngế tro tâ COVID-19 tung pơlê pơla a kong pơlê tá hâi ‘nâi xiâm kối tíu tâ tú, hiăng ai tơdroăng ki kuăn pơlê ôh tá bê tơmâng, tơngôu, tơdroăng kố tơ’lêi pro chiâng tâ tú pơreăng. Xua mê, khu hnê mơhno pơkâ thế kuăn pơlê đi đo mơdêk kơchăng laga ôh tá préa, tô tuăn; pêi xêh tơtro mâu troăng hbrâ, mơdât pơreăng COVID-19.

A Sa Ly tơplôu ƀă tơbleăng