VOV4.Xơ Đăng - Pơla hdrối kố nah, hên kong pơlê tung lâp tơnêi têa tối tơchoâm, kong pơlê Dak Lak tối krê trâm tơdroăng ôh tá ai tŭm pơkeăng, tơmeăm khăm pơlât pro kuăn pơlê tô tuăn. Pơla hdrối kố nah, Ngế pro xiâm hnê ngăn Chin phuh hiăng pơkuâ hneăng hôp tiah hmâ Chin phuh ‘na tơdroăng mê, tung mê tơpui hên ki xiâm tăng rah khu leăm rôe tơmeăm. Ngế pro xiâm hnê ngăn tơnêi têa pâ thế ki hdrối Khu xiâm ngăn Pơkeăng pơlât, pơkuâ, tơrŭm bă mâu khu xiâm, kơvâ cheăng thâ séa ngăn tâi tâng mâu pơkâ nôkố ki tơdjâk troh tăng rah leăm rôe pơkeăng, tơmeăm xúa tung khăm pơlât. Ing mê hbrâ rơnáu, mơ-eăm tơleăng mơnhên, pơkâ mâu hlá mơ-éa tro tiô pơkâ râ kơpêng.

Dế lăm pôu ngăn dêi kơnốu a Hngêi pơkeăng Đăi hok Ƀuôn Ma Thuột, kong pơlê Dak Lak nhŏng o dêi môi ngế tamo châi tối ăm ‘nâi, kơtăn kố 5 hâi, nhŏng o tro lo mơheăm troăng plâi nuih ƀă châ djâ khăm pơlât a Hngêi pơkeăng kân Kơpong Tây Nguyên. Tung tơdroăng khăm, pơlât ƀok thái pơkeăng tối ăm ‘nâi, tơdroăng châi dêi mâi nâ thế krâ Stent mạch vành mê nếo chiâng vâ tŏng rêh. Laga, xua Hngêi pơkeăng ôh tá ai kơmăi kố xua mê bu chiâng thâ pơlât apoăng ƀă pơkâ thế rơpŏng lăm pơlât a hngêi pơkeăng ki ai kơmăi mê:

‘’To lâi ngế pêi cheăng amê vâi hbrâ pơlât apoăng, vâi tối ăm ‘nâi hlối tơdroăng châi kố cho râ, a kố iâ mê kô hlâ yôh, nôkố akố ôh tá ai kơmăi kơmok vâ pơlât ôh’’.

Ôh tá xê to tá tŭm tơmeăm pơlât, hên ngế châi tamo a Dak Lak xuân trâm pá drêng rôe pơkeăng a mâu hngêi tê pơkeăng dêi hngêi pơkeăng. Tơdroăng ôh tá bê pơkeăng pơlât ƀă tơmeăm khăm pơlât châ pôa Nguyễn Đại Phong, Kăn pơkuâ Hngêi pơkeăng kân kơpong Tây Nguyên mơnhên. Pôa Phong tối ăm ‘nâi, xiâm kối cho tá hâi chiâng pêi pro mâu kơxô̆ liăn rôe hên tơmeăm ối tung hnoăng pơkuâ dêi Khu pơkuâ ngăn pơkeăng ƀă khăm pơlât kong pơlê Dak Lak.

‘’Troh nôkố u ối 2 kơxô̆ liăn ối tơvâ pơkâ dêi luât môi tiah kơxô̆ liăn tro mê ai mâu tơmeăm tá hâi châ chêh tối yă, tá hâi pơkâ pêi dêi Khu xiâm ƀă ai mâu tơdroăng mê mơ-éa phêp dêi vâi xuân tá hâi kêi đeăng lĕm ƀă kơxô̆ liăn rôe stent mạch vành, tung pơla kố nah mâu hngêi pơkeăng pơlât plâi nuih a Hà Nội ƀă mâu hngêi pơkeăng ki ê tơdjâk troh luât ‘na tơdroăng stent mạch vành xua mê tơdroăng vâ rôe dêi stent mạch vành cho mâu kŏng ti vâi dế kơchăng xua mê hngêi pơkeăng drêng kố dế séa ngăn. Tâng ôh tá pêi tro mê pro xôi luât’’.

Ôh tá bê pơkeăng ƀă tơmeăm khăm pơlât pro tơdroăng khăm pơlât a hngêi pơkeăng kân kơpong Tây Nguyên trâm pá

Pôa Nay Phi La, Kăn pơkuâ Khu pơkuâ ‘na pơkeăng ƀă khăm pơlât kong pơlê Dak Lak tối ăm ‘nâi, riân apoăng, a mâu tíu khăm, pơlât tung kong pơlê dế ôh tá tŭm mâu tơmeăm ki tơdjâk troh khăm ƀă pơlât môi tiah: pơkeăng mơdât pơreăng, pơkeăng tơdjâk troh khu generic, ki má lối cho pơkeăng pro rơdêi ivá drêng thâ pơlât.

Tiô pôa Nay Phi La, xiâm kối chiâng ai tơdroăng ôh tá bê pơkeăng, tơmeăm khăm pơlât cho xua pơreăng COVID-19 ton plâ 2 hơnăm hiăng hluâ hiăng pro tơđôu mâu tơdroăng mơjiâng pro ăm lâp plâi tơnêi, yă tơmeăm to kơnâ, logistic pơrá tâk xua mê pá vâ pơkâ mơ’no kơlo ki tro. Rơtế ƀă mê, tơdroăng rôe tơmeăm khăm pơlât ối pá tâ xua rơtế môi khu kơmăi laga tung dế gá phá tơ-ê dêi pó, ‘na tơdroăng kih thuât xuân tơ-ê xua mê yă xuân phá dêi pó.

Mâu pơkeăng châ klâ 5 khu vâ mơ’no liăn rôe laga tơmeăm khăm pơlât tá hâi châ klâ khu inhên, tá hâi tối ‘na tơdroăng ki loi tơngah, ki dâi lĕm dêi tíu mơjiâng pro xua mê yă phá tơ-ê dêi pó. Tơdroăng kố xuân pro mơdât tơdroăng pêi pro vâ mơ’no liăn rôe.

Vâ tah lôi pá puât pơtân, Khu hiăng pơkâ mâu tíu cheăng tê ăm pơkeăng ngăn tiô tơkêa pơtối tŏng kum pơkeăng tung lâp hngêi pơkeăng tung kong pơlê. ‘Na ton xŏn, kong pơlê kô mơjiâng môi tíu cheăng ki mơ’no liăn rôe krê tơniăn vâ kum mâu hngêi pơkeăng ôh tá trâm pá xua mâu pơkâ dêi luât:

‘’Ngin tơbleăng ăm Vi ƀan kuăn pơlê kong pơlê thế mơjiâng tơdrêng tíu xiâm mơ’no liăn rôe pơkeăng, tơmeăm khăm pơlât tơkŭm ăm tâi tâng kơvâ krê phá tơ-ê. Mơjiâng inâi pơkeăng, tơmeăm khăm pơlât krê ăm kong pơlê ing xiâm kối pin hiăng mơ’no liăn rôe tơmeăm khăm pơlât apoăng, mơjiâng môi pơkâ rak vế xuân môi tiah tŏng kum ‘na luât, kơxô̆ liăn ăm kăn ƀô̆ veăng tơbriât vâ mơ’no liăn rôe’’.

Hâi lơ 23/6 pơla kố nah, pôa Phạm Minh Chính, Ngế pro xiâm hnê ngăn tơnêi têa hiăng pơkuâ roh hôp Hnê mơhno má môi Chin phuh ‘na tơdroăng tê ăm pơkeăng, tơmeăm khăm pơlât ƀă mâu troăng tơniăn mơngế pêi cheăng ăm kơvâ khăm pơlât. Tiô tơbleăng dêi Khu xiâm pơkuâ ngăn pơkeăng ƀă khăm pơlât, nôkố ai tơdroăng ôh tá bê pơkeăng a mâu kong pơlê ƀă hngêi pơkeăng râ Tơnêi têa.

Xiâm kối cho ôh tá tŭm tơmeăm vâ pro mơjiâng pơkeăng, tơmeăm khoăng ôh tá ai hên, yă tơmeăm khoăng to kơnâ, tơdroăng rôe pơkeăng, tơmeăm khăm pơlât, trếo pơkeăng, mâu tơmeăm ăm hbrâ, mơdât pơreăng ƀă khăm, pơlât thăm rế pá tâ. Ki rơhêng vâ tối ai tơmiât tô tuăn, xâu xôi, xâu séa ngăn, ôh tá khên pêi, ôh tá khên rôe tơmeăm dêi mâu dêi mâu kong pơlê ƀă tíu cheăng.

Mơgêi roh hôp, pôa Phạm Minh Chính, Ngế pro xiâm hnê ngăn tơnêi têa tối nhên, xiâm kối cho ing tơná pin cho ki xiâm, ƀă tơdroăng tơkŭm po tơ’noăng há liăn vâ rôe tơkŭm hrá châ pêi pro; tá hâi thăm vâ tơpui tơno yă pơkeăng ƀă tơdroăng nôkố dêi kơchơ tê mơdró.

‘’Á pơkâ thế pêi pro kơtăng mâu pơkâ nôkố ‘na tơbriât há kơxô̆ liăn vâ rôe tơkŭm tá a tơnêi têa ƀă kong pơlê; tiô tơdroăng mê cho thế tơbleăng tơdrăng ôh tá tơdjâk pakong, tơdrăng tiô kơchơ mơdró, hbrâ mơdât kâ kơhveăm liăn ngân, ki pơxúa dêi khu vâ tơniăn châ xing xoăng pơkeăng tŭm ăm mâu hngêi pơkeăng. A ngiâ cho thế tơniăn bê pơkeăng tung inâi pơkeăng ai ƀaoh hiêm khăm pơlât.

Séa ngăn, hnê mơhno thăm pơkuâ tơnêi têa a mâu tíu cheăng ki tơdjâk troh pơkeăng vâ tơniăn ôh tá lôi hrá tung tơdroăng ăm phêp pơkeăng; teăm tơdrêng rơnêu, tơ’nôm mâu pơkâ vâ rĕng kơdroh pro mơ-éa. Thăm xing xoăng râ vâ rôe mâu tơmeăm khăm pơlât tiô tơbleăng pơkâ, pơkâ pêi troh ƀă thăm séa mơnhên, séa ngăn’’.

VOV Tây Nguyên rah chêh

A Sa Ly tơplôu ƀă tơbleăng