VOV4.Xơ Đăng - Tơbleăng ing Khu pơkuâ hnê hriâm ƀă hnê mơjiâng tuăn ngôa rơkê kong pơlê Kon Tum hâi lơ 2/3/2022 tối ăm ‘nâi, tâi tâng kơvâ hnê hriâm dế ai 3.078 ngế hok tro ƀă thái cô cho F0. Ki nhên tung kơxô̆ kố ai 416 ngế kăn ƀô̆, thái cô, mâu ngế pêi cheăng ƀă 2.662 ngế hok tro cho F0. Tung mê hngêi trung râ má péa ai hên F0 má môi ƀă 1.302 ngế o hok tro, iâ má môi cho râ mâm non 256 ngế o hok tro.

Chôu pơtê dêi mâu vâi o hok tro râ má môi a cheăm Đăk Pxi, tơring Đăk Hà, kong pơlê Kon Tum

Nôkố mơhé ai troh 3.078 ngế hok tro ƀă thái cô cho F0, laga tâi tâng mâu hngêi trung tung kong pơlê Kon Tum xuân dế pêi pro tơdroăng hnê hriâm tơdrêng ƀă tâi tâng mâu râ hriâm ƀă kơxô̆ hok tro lăm hriâm tơdrêng cho 89%. Bu môi iâ ngế hok tro hriâm mơ’no tơdrêng tung um tiô troăng măng Internet vâ hbrâ mơdât pơreăng.

Ki nhên khât ăm hlo tơdroăng mơdât pơreăng xông tâ tú COVID-19 a mâu hngêi trung a kong pơlê Kon Tum, ki má lối cho kơpong hdroâng kuăn ngo dế trâm hên pá puât.

A Sa Ly tơplôu ƀă tơbleăng