VOV4.Xơ Đăng -  A kong pơlê Kon Tum mâu khế hdrối kơxô̆ mơngế F0 athế pơlât tơkŭm hiăng tâk troh lối hrĭng ngế mê troh mâu hâi apoăng dêi khế 4 kố hiăng kơdroh hên. Tơdroăng ăm ‘nâi sap ing Khu ngăn pơkeăng ƀă khăm pơlât kong pơlê Kon Tum ăm hlo, nôkố a lâp kong pơlê bu ối 65 ngế F0 dế athế pơlât tơkŭm a mâu tíu khăm pơlât. Rơtế amê kơxô̆ ngế F0 ki hlo râ kal athế troh a mâu tíu khăm pơlât pơtối hlo kơdroh. Tiê̆n sih - Ƀok thái pơkeăng chuyên khoa II Võ Văn Thanh, Kăn pơkuâ Khu ngăn pơkeăng ƀă khăm pơlât kong pơlê Kon Tum ăm ‘nâi, rơtế ƀă tơdroăng ki kơhnâ rak ngăn, séa ngăn, pơlât ăm 3.500 ngế F0 nôkố dế klâ ối krê, pơlât xêh a hngêi, kơvâ ngăn pơkeăng kong pơlê xuân hbrâ rơnáu ăm tơdroăng ki pơlât, tiâ mơnhên ăm mâu ngế ki klêi kơ’nâi hiăng tro COVID-19.

Hngêi pơkeăng cheăm Ia Chim, pơlê kong kơdrâm Kon Tum tiâ mơnhên ăm kuăn pơlê pâk vaccine hbrâ mơdât pơreăng COVID-19

Sap ing apoăng ai pơreăng tâ tú troh nôkố kơvâ ngăn pơkeăng pơlât kong pơlê Kon Tum hiăng ai dâng 45 rơpâu ngế tâ pơreăng COVID-19. Tung mê ai lối 40 rơpâu ngế klâ ối krê séa ngăn pơlât xêh a hngêi ƀă hiăng prêi.

Katarina Nga tơplôu ƀă tơbleăng