VOV4.Xơ Đăng - COVID-19 klêi kơ’nâi prêi lĕm lôi chiâng troh 203 tơdroăng tamo, tung mê ki hên má môi cho ‘na troăng hiâm. Mê cho tơdroăng châ tối a Hneăng hôp khoa hok pơlât tơdroăng tamo klêi kơ’nâi prêi lĕm COVID-19 ƀă troăng pơlât tơrŭm pơla pơkeăng rêi nhâ hlá loăng ƀă pơkeăng tiô rơxông nếo roh apoăng châ Khu pơkuâ ‘na pơkeăng rêi nhâ hlá loăng Việt Nam tơkŭm po kơxo lơ 30/3, a Hà Nội.

Tung pơla kố nah, Khu pơkuâ ‘na pơkeăng rêi nhâ hlá loăng Việt Nam hiăng mơnúa pơlât ƀă pơkeăng rêi nhâ hlá loăng ăm 900 ngế tro COVID-19 sap ing hneăng apoăng. Ngế ki tro tâ pơreăng hơnăm iâ má môi 3 hơnăm, hên hơnăm má môi 90 hơnăm. Klêi kơ’nâi pơlât mê ôh tá ai ngế ki lâi châi râ.

Ing tơdroăng ki khât kố pơlât tơrŭm pơla pơkeăng rêi nhâ hlá loăng ƀă pơkeăng rơxông nếo ăm mâu ngế klêi kơ’nâi prêi lĕm pơreăng COVID-19, Tie#n sih Trần Quốc Hùng, Kăn pơkuâ hngêi pơkeăng kân pơlât ƀă rêi nhâ hlá loăng Hà Nội tối: mâu tơdroăng châ tơƀrê kố kô kum Khu pơkuâ ‘na pơkeăng rêi nhâ hlá loăng Việt Nam môi tuăn mâu troăng hnê mơhno pơlât klêi kơ’nâi prêi lĕm COVID-19 ƀă pơkeăng rê nhâ hlá loăng ƀă pơkeăng rơxông nếo.

A Sa Ly tơplôu ƀă tơbleăng