VOV4.Xơ Đăng - Dế nôkố, kơvâ ngăn ‘na pơkeăng ƀă khăm  pơlât tung lâp tơnêi têa dế pêi pro krâu khât tung pâk pơkeăng hbrâ mơdât vaccine tung lâp lu vâ kum kuăn pơlê châ hbrâ mơdât tơdroăng tâ tú pơreăng COVID-19. Tơdrêng  ƀă tơdroăng khăm pơlât mơngế tamo xua F0 a hngêi, ki tơngâ bu iâ, mê koio chiâng pơlât dâi xêt khât, rĕng mo lĕm châ, tơdroăng rêh ối vêh môi tiah hmâ.

Hlo tâ tú pơreăng COVID-19 tung kuăn pơlê tâk hên, pơlê kong kân Đà Nẵng hiăng hnê mơhno mơdêk tơbleăng  pro hngêi pơkeăng cheăm ki lăm pơlât ukố umê tung pơlê kong kân vâ teăm pơlât ngăn tơ-ƀrê ăm mâu ngế ki F0 dế pơlât a hngêi. Ing mê, kơdroh hngăm hgno hâ ho ăm mâu hngêi pơkeăng ki dế pơlât rak ngăn mâu ngế châi tamo.

Bêng Thanh Khê Tây, pơlê krâm Thanh Khê cho môi tung hên bêng a pơlê kong kân Đà Nẵng tơbleăng pro hngêi pơkeăng ki lăm pơlât ukố umê vâ pơlât mâu ngế F0 a hngêi. Hngêi pơkeăng dêi bêng dế kum pơlât ăm 147 ngế  F0 a hngêi, troh nôkố vâ chê 50 ngế hiăng prêi lĕm. Ƀok thái pơkeăng Đỗ Văn Đô, Ngế xiâm pơkuâ hngêi pơkeăng ki lăm pơlât ukố umê dêi bêng Thanh Khê Tây ăm ‘nâi, tơdroăng cheăng rêm hâi dêi mâu ngế cheăng ‘na khăm pơlât a Hngêi pơkeăng mê cho rak ngăn inâi  pơlât mâu ngế F0 tiô kơ tơrêm khu mơngế ki tâ tú.

Ngế kăn pơkeăng pơlât dêi Hngêi pơkeăng ki lăm pơlât ukố umê bêng Thanh Khê, Đà Nẵng lăm pôu a hngêi khăm ăm mơngế ki  F0

Kăn ƀô̆ ngăn pơkeăng đi đo krếo tơpui ƀă mơngế ki tâ COVID-19  ing phôn vâ tí tăng ‘nâi plĕng tơdroăng ‘na ivá ƀă hnê pơlât drêng kal: 

“Mâu ngế ki tâ pơreăng mê tâng xiâm apoăng gá tâ hâ rơtá nuôih ‘nâ hía  châi klêa lơ  tâ châi  lơ tơviah ‘lo tung châ mê á kô troh lăm khăm mâu ngế ki tiah mê. Mơ’nui hâi, á kô tơkŭm inâi tâi tâng mâu ngế ki lâi hâi lăm khăm, kô lăm khăm vâ ‘nâi hôm ai tơdroăng pơlât ki klâi há”.

A pơlê krâm Sơn Trà, pơlê kong kân Đà Nẵng rêm hâi ai vâ chê 200 ngế F0. Mâu Hngêi pơkeăng ki lăm pơlât ukố umê dêi 7 to bêng tung pơlê kong kân hiăng hdró, kum khu hnê mơhno hbrâ mơdât pơreăng dêi pơlê kong krâm rak ngăn, séa ngăn tơdroăng pơlât F0 a hngêi krâu khât tâ.

Rêm to Hngêi pơkeăng ki lăm pơlât ukố umê ai hbrâ 2 to xoăng koi pơlât ai kơtuh tâ pơkeăng, mâu kên pâng môh rơkong, kơmăi vê ngăn kơtêi,  ƀă hên tơmeăm ki ê ƀă mâu tơmeăm ki vâ xúa tung khăm ngăn têa hế têa môh, pôa Huỳnh Văn Hùng, kăn phŏ hnê ngăn Vi ƀan pơlê krâm Sơn Trà, pơlê kong kân Đà Nẵng ăm ‘nâi, xua mâu ngế ki cheăng khăm pơlât bú iâ mê pơlê ki châi tamo krâm thế mơhnhôk tăng khu ngăn pơkeăng ki hiăng pơtê xua hơnăm hiăng krâ, mâu ngế pleăng hnoăng tơná veăng pêi cheăng khăm pơlât a mâu Hngêi pơkeăng ki lăm pơlât ukố umê:

“Vi ƀan mâu bêng hiăng krếo mâu ngế ki kum pêi cheăng xuân môi tiah mâu ngế ki pleăng hnoăng cheăng veăng pêi mâu tơdroăng cheăng. Troh nôkố, bă kơxô̆ mơngế pơlât F0 a hngêi tung pơlê krâm ai lối 1.600 ngế. Tơdroăng pơlât mê troh nôkố xuân tơniăn. Mâu tơdroăng cheăng xuân môi tiah  mơnhên mâu tơdroăng pâ thế, lăm pôu kơ êng mâu ngế  tâ pơreăng teăm tơdrêng”.

Ngế xiâm ngăn pơkeăng pơlât.

Nôkố, pơlê kong kân Đà Nẵng ai vâ chê 30 to hngêi pơkeăng ki pơlât ukố umê  châ mơjiâng ƀă dế pêi cheăng khăm pơlât. Tiô tối ăm ‘nâi, mâu hngêi pơkeăng ki lăm pơlât ukố umê rôh apoăng hiăng pơtối rak vế ki pơxúa, kum kơdroh hâ ho hngăm hngo tơdroăng cheăng ăm mâu hngêi pơkeăng ki pơlât mâu ngế châi tamo, rak ngăn ƀă pơlât tơ-ƀrê F0 ki ôh tá râ.

Tiô Ngế xiâm ngăn pơkeăng pơlât Nguyễn Thanh Long, tơdroăng pơlât ăm mâu ngế tâ COVID -19 a tơnêi têa pin dế hlo tơ-ƀrê. Kơxô̆ mơngế hlâ rế kơdroh iâ. Pêi pro tiô Pơkâ 128 dêi Chin phuh ‘na  hmâ tơniăn, ƀê̆n ƀeăn rơkê, kâi mơdât pơreăng  COVID-19, Khu xiâm ngăn pơkeăng hiăng pơ’lêh chiâng troăng rơhlâ rak ngăn ki ôh tá mơhúa tơtro ƀă tơdroăng cheăng pêi tơchoâm plâ mơdât pơreăng tung lâp plâi tơnêi.

Malối, klêi pơkâ vâ F0 ki ôh tá ‘nho râ châ pơlât a hngêi, mâu hngêi pơkeăng khăm pơlât châ kơdroh hâ ho, hngăm hngo, châ tơ’lêi khăm pơlât mâu tơdroăng vâ kơdroh kơxô̆ mơngế hlâ.

“Ki kal má môi nôkố pin hiăng châ pâk vaccine a kơlo ki hên, cho 1 tung mâu kong têa ki ối má môi dêi lâp plâi tơnêi ‘na châ pâk tŭm vaccine. La ngin xuân ‘nâi nhên, vaccine cho khuă ki kal vâ djâ tơdroăng rêh ối vêh tiah hmâ, tơ’nôm ƀă mâu tơdroăng khăm pơlât nếo. Xua mê, khu xiâm ngăn pơkeăng pơlât hiăng tối tơbleăng ăm Chin phuh, Ngế pro xiâm hnê ngăn chin phuh tơbleăng tơdroăng pâk vaccine rơnó Hơngui ƀă pâk tung mâu hâi Têt, ôh tá ai hâi pơtê ƀă pâk ăm tâi tâng rêm ngế ki troh lăm pâk.  Ƀă mâu ngế kuăn pơlê ki vêh kâ Tết mê xuân chiâng chêh inâi pâk hlối a mâu pơlê cheăm ki mê’’.

Khu xiâm ngăn pơkeăng pơlât pro tơniăn ai tŭm vaccine hbrâ mơdât COVID-19 vâ pâk ăm kuăn pơlê. Tơdroăng pâk vaccine ôh tá xê pơklât thế la kal hnê tối hdrối troh tâi tâng kuăn pơlê ăm ‘nâi nhên ki pơxúa, tơbrê dêi tơdroăng pâk vaccine. Ki khât gá hiăng ăm hlo ai troh lối 80% ngế tâ COVID-19 hlâ tung  pơla hdrối kố nah xuân to mâu ki ôh tá pâk vaccine ƀă ki hên to mâu hơnăm hiăng hên, tung châ hiăng ai tơdroăng châi.

Pôa Nguyễn Thanh Long, Ngế xiâm ngăn pơkeăng pơlât tối,  Tơdroăng pâk a rơnó Hơngui kô veăng kum rĕng djâ tơdroăng rêh ối vêh tiah hmâ.

“Pin hiăng tơvâ tơvân vâ chê 2 hơnăm hdrối ƀă hnoăng pêi pro mê pơxúa kân ‘nâng. ngin xuân pâ mơnê kơ tâi tâng mâu rơpŏng hngêi dêi mâu kăn ƀô̆ ngăn pơkeăng hiăng tơmâng khât, cho tíu kơnôm tơngah dêi mâu kăn ƀô̆ ngăn pơkeăng hmiên tuăn pêi cheăng. Ngin xuân pâ mơnê kơ kuăn pơlê  hiăng veăng tơrŭm ƀă, veăng kum, rơtế ƀă kơvâ ngăn pơleăng tung tơdroăng hbrâ mơdât pơreăng.

Drêng troh hơnăm nếo pâ pơtroh rơkong rơkâu ăm tâi tâng mâu ngế ngăn pơkeăng  pơlât môi hơnăm ếo mo xêi têi ‘răng, hơniâp ro ƀă pơtối pêi cheăng tơ-ƀrê  ƀă ki kal tâ rĕng kâi mơdât pơreăng, rê̆ng djâ tơdroăng rêh ối tơniăn môi tiah hmâ vâ tơkŭm mơnhông mơdêk cheăng kâ-rêh ối”.

VOV1 chêh

Gương tơplôu ƀă tơbleăng