VOV4.Xơ Đăng - Tiô Khu xiâm pơkuâ ngăn pơkeăng ƀă khăm pơlât lâp plâi tơnêi, ôu  hât cho xiâm kối pro lối 8 rơtuh ngế hlâ tung lâp plâi tơnêi rêm hơnăm. Tung mê lối 7 rơtuh ngế hlâ xua ôu hât ƀă dâng 1,2 rơtuh ngế hlâ xua tro hrik ngôi hât. Ôu hât xuân cho xiâm kối pro tâk tơ’lêi tro mâu pơreăng troăng hiâm ƀă pro tơdroăng châi troăng hiâm thăm râ.

Tiô mơnhên ngăn dêi khu rơkê ngăn pơkeăng ƀă khăm pơlât WHO tơkŭm po a hâi lơ 29 khế 4 hơnăm 2022 ăm hlo mâu ngế ôu hât kô tơ’lêi tro châi râ tung ivá xua COVID-19 tâng pơchông ƀă mơngế ôh tá ôu hât. Pakĭng tơdjâk ‘mêi troh ivá, ôu hât ối pro lŭp ‘na cheăng kâ ƀă mâu ngế krê, rơpŏng ƀă pơlê pơla, tơdroăng tro lŭp kố tá mơ’no liăn ăm ôu hât, kơxô̆ liăn khăm pơlât tơdjâk troh ôu hât, kơdroh ivá ôh tá kâi vâ pêi cheăng xua châi tamo ƀă rĕng hlâ. 

Tiô xêo ngăn dêi Khu xiâm pơkuâ ngăn pơkeăng ƀă khăm pơlât lâp plâi tơnêi, tơdroăng tro lŭp ‘na cheăng kâ xua ôu hât pro rêm hơnăm cho 1.400 rơtal dollars Mih.

Vâ pơtâng tối troh pơlê pơla ki tơdjâk ‘mêi dêi hât troh kong prâi, Khu xiâm pơkuâ ngăn pơkeăng ƀă khăm pơlât lâp plâi tơnêi rah xo pơtâng hnê ‘’Hât – tơdroăng ki mơnhâu troh kong prâi pin’’ pro tơdroăng pơxá Hâi lâp plâi tơnêi ôh tá ai hât 31/5/2022. Ing tơdroăng pơxá kố, Khu xiâm pơkuâ ngăn pơkeăng ƀă khăm pơlât lâp plâi tơnêi krếo thế mâu kong têa thăm pêi pro tơdroăng mơdêk hlê plĕng dêi pơlê pơla ‘na tơdjâk ‘mêi dêi ôu hât troh kong prâi, ôh tá ôu hât vâ kơdroh tơdroăng pro ‘mêi kong prâi ƀă ivá.

A Việt Nam, kơxô̆ mơngế ôu hât kơdroh sap ing 22,5% hơnăm 2015 chu 21,7% hơnăm 2020. Ki rơhêng vâ tối kơxô̆ mơngế mơhnŏng ôu hât xuân kơdroh a mâu tíu môi tiah: tiú pêi cheăng, hngêi pơkeăng, hngêi trung, tung rơxế ki tơdjuôm ƀă kơpong tung hngêi. Tiô tơdroăng séa ngăn ivá hok tro lâp plâi tơnêi a Việt Nam xua Khu xiâm pơkuâ ngăn pơkeăng ƀă khăm pơlât lâp plâi tơnêi pêi pro hơnăm 2019, kơxô̆ mơngế ôu hât tung hok tro hơnăm sap ing 13 – 17 kơdroh sap ing 5,35% hơnăm 2013 chu 2,78% hơnăm 2019, kố cho mâu tơdroăng ki châ tơƀrê mơhnhôk tung tơdroăng mơdât ôu hât tung rơxông ối nếo.

Mơhnhôk Hâi plâi tơnêi ôh tá ai hât lơ 31/5/2022, Măng tĭng leh tơnêi têa ôh tá ai hât sap hâi lơ 25/5 troh hâi lơ 31/5, Khu xiâm pơkuâ ngăn pơkeăng ƀă khăm pơlât hiăng ai mơ-éa pơkâ thế Vi ƀan mâu kong pơlê, pơlê kong kơdrâm tơrŭm ƀă hnê mơhno mâu kơ koan tung kong pơlê, pơlê kong kơdrâm thăm pêi pro tơdroăng mê cho: Thăm pơtâng tối ki tơdjâk ‘mêi dêi tơdroăng ôu hât ƀă Luât hbrâ, mơdât ki tơdjâk ‘mêi dêi hât; Thăm tơrŭm kơvâ tung tơdroăng hbrâ mơdât ki tơdjâk ‘mêi dêi hât; Thăm séa ngăn tơdroăng pêi pro Luât hbrâ, mơdât ki tơdjâk ‘mêi dêi Hât tung kong pơlê.

Mai Lê – Quang Nhật chêh

A Sa Ly tơplôu ƀă tơbleăng