VOV4.Xơ Đăng - Vâ pro kế ki tât rak vế vâi hdrêng ‘na pơreăng kân COVID-19, tung khế 4 ƀă khế 5/2022, Tíu xiâm Séa ngăn châi tamo kong pơlê Dak Lak kô tơbleăng pâk vaccine hbrâ mơdât COVID-19 ăm vâi hdrêng sap ing 5 troh pá xôp 12 hơnăm a kong pơlê. Kố cho tơdroăng cheăng ki kal khât, laga vâi hdrêng tung hơnăm ki kố tá hâi mơnhông, rơkê tâi ‘na châ chăn mê kơvâ ngăn pơkeăng ƀă khăm pơlât hiăng tơbleăng hên troăng hơlâ vâ rak tơniăn má môi ăm tơdroăng ki pâk vaccine.

Vaccine hbrâ mơdât pơreăng COVID-19 châ pâk ăm vâi hdrêng sap ing 5 troh pá xôp 12 hơnăm cho vaccine Pfizer/BioNTech ƀă Moderna. Kơtăn dêi rơpó pơla 2 hdroh pâk ai 4 măng tĭng. Khu xiâm ngăn pơkeăng ƀă khăm pơlât pơkâ thế bu pâk 2 trum xo rơtế ƀă túa vaccine, ôh tá chiâng pâk hơ’lâk ƀă mâu vaccine mRNA ki lâi ôh.

Ƀă klŏng pâk ăm vâi hdrêng tung khu ki kố, vaccine Pfizer ai liêu lươ̆ng 0,25ml, pâk a kŏng; vaccine Moderna pâk ƀă 1/2 klŏng ki xiâm dêi môi ngế ki kân (tơ’mô 0,25ml), pâk a kŏng.

Pơlê kong kơdrâm Ƀuôn Ma Thuột cho pơlê kong kơdrâm ki apoăng pâk vaccine hbrâ mơdât COVID-19 ăm vâi hdrêng sap ing 5 troh pá xôp 12 hơnăm. Vâ hnoăng cheăng pâk vaccine kố châ tơkŭm pâk tơniăn, tơƀrê, Tíu xiâm ngăn pơkeăng ƀă khăm pơlât pơlê kong kơdrâm Ƀuôn Ma Thuột hiăng hbrâ nhên sap ing tơdroăng ki chêh inâi vâi hdrêng tung hơnăm ki châ pâk, tối tơbleăng tung rơ’jiu, um tơvi mơdêk ki hlê plĕng ƀă mơhnhôk mâu nôu, pâ djâ dêi kuăn lăm pâk ƀă hnê tối troh hnoăng cheăng rak tơniăn a mâu tíu pâk vaccine.

Ƀok thái pơkeăng Võ Minh Hùng, kăn pơkuâ Tíu xiâm ngăn pơkeăng pơlê kong kơdrâm Ƀuôn Ma Thuột ăm ‘nâi:

“Vâ rak vế hnoăng cheăng pâk vaccine ăm vâi hdrêng châ tơniăn má môi, Tíu xiâm ngăn pơkeăng pơlât hiăng tơkŭm hnê hriâm ăm tâi tâng kăn ƀô̆ ngăn pơkeăng dêi mâu cheăm, bêng veăng pâk vaccine tung rôh kố ‘na kih thuât pâk vaccine ăm vâi hdrêng sap ing 5 troh pá xôp 12 hơnăm, hnoăng cheăng rak ngăn vâi hdrêng, xing xoăng tơdroăng cheăng ăm tơdroăng ki pơlât tơdrêng ukố umê, rak ngăn a mâu tíu pâk vâ hbrâ rơnáu veăng tŏng kum, pơlât ăm vâi hdrêng tâng ai ngế hdrêng ki lâi tơdroăng ôh tá mơhúa klêi pâk”.

Tung tơdroăng ki pâk vaccine hbrâ mơdât COVID-19 rôh kố, Hngêi trung râ má môi, hngêi trung râ má péa ƀă hngêi trung râ má pái Victory ai dâng 1.500 ngế hok tro tung hơnăm ki châ pâk. Vâ rak tơniăn ăm rôh pâk kố, hngêi trung hiăng hbrâ rơnáu séa ngăn mâu inâi dêi mâu hok tro, xo mâu rơkong tơpui tối dêi mâu nôu, pâ hok tro sap ing hên khế hdrối.

Pakĭng mê, hngêi trung ối mơdêk rơdêi hnoăng cheăng hnê tối ăm mâu nôu, pâ hlê ‘na ki pơxúa dêi tơdroăng ăm vâi hdrêng pâk vaccine ƀă rơhêng vâ tâi tâng mâu nôu, pâ môi tuăn ăm vâi hdrêng pâk vaccine.

Thái Mai Đường Thế Huy, kăn phŏ pơkuâ hngêi trung tối:

“Tơdroăng ki pâk vaccine kố mê hngêi trung hiăng hbrâ rơnáu séa ngăn tăng ‘nâi ‘na mâu hok tro, xo rơkong ki tơpui tối dêi nôu pâ mâu hok tro sap ing 9 khế hdrối.  Pakĭng mê, hngêi trung ối mơdêk hnoăng cheăng hnê tối ăm mâu nôu pâ hok tro klê nhên ‘na ki pơxúa dêi tơdroăng ăm vâi hdrêng pâk vaccine ƀă rơhêng vâ tâi tâng nôu pâ hok tro môi tuăn ăm dêi kuăn pâk.

Pakĭng tơdroăng ki tơrŭm ƀă kăn ƀô̆ ngăn pơkeăng bêng, hngêi trung ối hbrâ rơnáu tŭm mâu kế tơmeăn xúa, tơkŭm po mâu rôh pâk vaccine krê xêh, mâu lâm pâk tiô tơdroăng pơkâ, xing xoăng chôu pâk vâ rak tơniăn ăm mâu vâi o”.

Maluâ tô tuăn drêng ăm dêi kuăn pâk la ki hlê plĕng nhên tơdjâk dêi pơreăng, tơdrêng amê hlối hbrâ rơnáu hiâm mơno ăm tơdroăng ki rêh ối môi tiah nếo, hên mâu nôu, pâ hok tro hiăng hbrâ rơnáu tăng ‘nâi ‘na vaccine xuân môi tiah rak ngăn ivá châ chăn ăm vâi hdrêng vâ rak tơniăn ăm hnoăng cheăng pâk vaccine châ pâk tơniăn.

Ngoh Bùi Đình Nguyên (ối a cheăm Hòa Thắng, pơlê kong kơdrâm Ƀuôn Ma Thuột) tối:

“Krê tơná ngoh môi tuăn ƀă hmiân tuăn ƀă tơdroăng ki tơmâng ngăn dêi hngêi trung ‘na tơdroăng pâk vaccine ăm dêi kuăn. ‘Na Vaccine, la xuân ai tơdroăng ki tô tuăn la nôkố tung lâp plâi tơnêi hiăng hriăn ngăn ƀă hiăng pâk hên mê xuân hmiân tuăn ôh tá ai tơdroăng klâi tơmiât. A mâu kong pơlê xuân pâk hên mê xuân hlo tơniăn”.

Tiô kơxô̆ ki riân ngăn dêi Tíu xiâm séa ngăn châi tamo Dak Lak, kơxô̆ ngế tâ COVID-19 a vâi hdrêng pá xôp 12 hơnăm a kong pơlê châ dâng 20% tung tâi tâng kơxô̆ mơngế tâ. Xua vâi hdrêng pá xôp 12 hơnăm tá hâi châ pâk vaccine mê kố cho xiâm kối ki tâ tú pơreăng.

Xua mê, vâ rak vế ƀă kơdroh ki tâ tú dêi pơreăng, tơdroăng pâk vaccine hbrâ mơdât pơreăng ăm vâi hdrêng sap ing 5 troh pá xôp 12 hơnăm cho tơdroăng ki kal khât. Drêng pâk vaccine hbrâ mơdât COVID-19, tung châ dêi vâi hdrêng kô pro chiâng ai kế ki mơdât virus ing mê pro kơdroh ki tâ pơreăng, tơdrêng amê hlối kum pro kơdroh iâ hâi khế ki tâ pơreăng, kơdroh tơdroăng ki râ, mâu tơdroăng ki pơ’lêh chiâng râ ƀă hlâ a vâi hdrêng.

Ki khât gá, tơdroăng pâk vaccine hbrâ mơdât COVID-19 ăm vâi hdrêng sap ing 5 troh pá xôp 12 hơnăm ai pơxúa kal khât, pro kơdroh ‘na pơreăng chiâng râ, kơdroh ki tâ tú ăm mâu ngế ki ê tung rơpŏng hngêi, malối cho ngế ki mơni tơ’lêi tâ tú, mâu ngế ki mơdât pâk vaccine ƀă mâu ngế ki tá hâi tro hơnăm pâk vaccine, tơdrêng amê hlối veăng kum mơdêk tơdroăng ki pâk tâi tâng tung pơlê pơla, veăng kum pro chiâng hmâ tơniăn, hbrâ mơdât pơreăng tơƀrê pơreăng COVID-19.

Ƀok thái pơkeăng Trịnh Quang Trí, kăn pơkuâ Tíu xiâm séa ngăn châi tamo kong pơlê Dak Lak tối nhên tâ ing rôh tơpui tơno a kơ’nâi kố.

-Ô ƀok thái pơkeăng, vaccine hbrâ mơdât COVID-19 ai tơdjâk môi tiah lâi tung tơdroăng ki rak vế vâi hdrêng tro pơreăng ?

Pôa Trịnh Quang Trí: Drêng pâk vaccine hbrâ mơdât COVID-19 kô ai mâu tơdroăng pơxúa: Má môi, pro kơdroh kơxô̆ ngế tâ pơreăng, má 2, pro kơdroh tơdroăng ki râ a ngế ki tâ pơreăng, má 3 pro kơdroh ki tâ tú tung pơlê pơla, má 4, pro kơdroh hâi khế tro pơreăng, tâng pin ôh tá pâk vaccine mê hâi khế tro pơreăng gá kô ton tâ, drêng pâk vaccine, ai kế ki mơdât, hâi khế tro kô iâ tâ, pro rak vế ƀă rak ngăn ivá ăm vâi hdrêng tơniăn tâ.

-Túa vaccine châ ăm phêp pâk ăm vâi hdrêng sap ing 5 troh pá xôp 12 hơnăm cho vaccine ki lâi ? Ki tơniăn gá tiah lâi, ô ƀok thái pơkeăng ?

Pôa Trịnh Quang Trí: Tung rôh kố, vaccine pâk ăm vâi hdrêng sap ing 5 troh pá xôp 12 hơnăm Khu xiâm ngăn pơkeăng ƀă khăm pơlât kô hbru ăm mâu kong pơlê 1 tung 2 túa vaccine. Túa má môi cho vaccine Pfizer dêi Mih. Vaccine kố châ pâk ăm vâi hdrêng sap ing 5 troh pá xôp 12 hơnăm ƀă liều lươ̆ng 0,2ml nồng đô̆ kháng nguyên 10mg ăm môi hdroh pâk. Hnê pơchân mâu vâi muăn sap ing 5 troh pá xôp 12 hơnăm kô pâk rơtế môi túa vaccine kố tung pơla 2 trum pâk kơtăn dêi rơpó ai 4 măng tĭng.

Túa vaccine ki má 2 cho vaccine Moderna. Vaccine kố châ pâk ăm vâi hdrêng sap ing 6 troh pá xôp 12 hơnăm. Tiah mê, ƀă vâi hdrêng ki sap ing 5 troh 6 hơnăm bu pâk vaccine Pfizer. Ƀă vaccine Moderna, pin chiâng pâk vaccine ki kố ăm mâu ngế ki hiăng hên hơnăm ƀă vâi hdrêng ăm vâi hdrêng la nồng đô̆ vaccine kố bu ƀă 1 kơpêng 2 tâng pơchông ƀă mâu ngế ki hiăng kân, ki nhên vâi hdrêng kô châ pâk 0,25ml, 2 trum xuân kơtăn dêi rơpó 4 măng tĭng. Tá 2 túa vaccine kố hiăng châ Kơ koan Rak ngăn Pơkeăng ƀă kế kâ Mih, Kơ koan Rak ngăn pơkeăng Châu Âu xuân môi tiah Khu xiâm ngăn pơkeăng ƀă khăm pơlât  kĭ pơkâ ăm xúa.

Klêi kơ’nâi séa ngăn dêi mâu kong têa hiăng xúa vaccine kố ăm hlo vaccine kố gá chía tơniăn, iâ tơdroăng ki tơdjâk klêi kơ’nâi pâk ƀă mâu vâi muăn ki châ pâk .

-Ô ƀok thái pơkeăng, klêi kơ’nâi pâk vâi hdrêng hmâ trâm mâu tơdroăng ki klâi ƀă hôm rơ-iêo klâ há?

Pôa Trịnh Quang Trí: Ƀă 2 túa vaccine Pfizer prếi vaccine Moderna, mâu tơdroăng ki tơdjâk klêi kơ’nâi pâk dêi mâu tíu ki séa ngăn, pâk pơkeăng ki hên cho mâu tơdroăng ki tơdjâk trâm môi tiah êi, châi a tíu pâk, châ chăn tơngê iâ, mâu tơdroăng ăm hlo kố kô tâi klêi kơ’nâi to lâi hâi pâk.Nôkố ai mâu vâi muăn ki hiăng tâ COVID-19, ƀă mâu vâi muăn ki tâ COVID-19 mê kô pơtê ‘nôi klêi kơ’nâ hiăng châ 3 khế ah mê nếo chiâng pâk ăm vâi muăn. 

-Ê, mơnê kơ ƀok thái pơkeăng !

Chêh tối: Mai Lê - Quang Nhật

Katarina Nga tơplôu ƀă tơbleăng