VOV4.Xơ Đăng - Nôkố, Khu ngăn pơkeăng ƀă khăm pơlât lâp plâi tơnêi WHO xuân ngăn COVID-19 cho pơreăng kân ƀă xuân ối tô tuăn ‘na ivá ki pơtối ai tơ’nôm mâu túa pơ’lêh ki nếo dêi virus SARS-CoV2. A Việt Nam, maluâ ai rơkong tơpui tối, pơkâ mơ’no ngăn COVID-19 cho pơreăng tiah hmâ la tiô hên khu ki rơkê ‘na khăm pơlât, bu athế ngăn tơdroăng pơkâ mơ’no kố cho mâu tơdroăng ki hbrâ rơnáu ăm la ngiâ.

Khu xiâm ngăn pơkeăng ƀă khăm pơlât hiăng tối, dế nôkố tá hâi rôh vâ pơkâ mơ’no tơdroăng kố châ mơnhên. A tơnêi têa pin pơreăng nếo dế ai mâu tơdroăng ki hlo hơ’lêh pơtối pơla hneăng pơreăng kân chiâng hneăng pơreăng ki tâ tú, mê chiâng vâ ngăn COVID-19 cho pơreăng ki tiah hmâ. Mâu khu ki rơkê plĕng xuân tối tiah kố, Việt Nam kal pơtối tơrŭm krá ƀă Khu tơrŭm ngăn pơkeăng ƀă khăm pơlât lâp plâi tơnêi xuân môi tiah mâu khu tơrŭm kong têa ƀă mâu kong têa ki ê séa ngăn tơdroăng ki pơ’lêh dêi pơreăng COVID-19.

Ing mê mơni kô tí tăng ‘nâi plĕng ăm Chin phuh pơkâ ngăn pơreăng COVID-19 cho pơreăng tiah hmâ môi rôh ki tơtro, ƀă mơni 6 khế mơ’nui hơnăm tơdroăng kố kô chía tâ iâ nếo séa ngăn troh, pôi tá tơngôu tung tơdroăng ki hbrâ mơdât pơreăng.

Katarina Nga tơplôu ƀă tơbleăng