VOV4.Xơ Đăng - Kơxo lơ 10/3, Hngêi pơkeăng kân Tâm Anh tối ăm ‘nâi, trếo tung châ ki mơdât pơreăng Evusheld dêi AstraZeneca - trếo tung châ ki mơdât pơreăng apoăng tung lâp plâi tơnêi vâ hbrâ mơdât COVID-19 hiăng châ Khu xiâm pơkuâ ngăn pơkeăng ƀă khăm pơlât ăm phêp xúa a Việt Nam. Hngêi pơkeăng kố hiăng xo trếo tung châ ki mơdât pơreăng Evusheld vâ pâk ăm khu ngế ki tơ’lêi tro tâ pơreăng COVID-19 ki râ.

Ki nhên, trếo tung châ ki mơdât pơreăng Evusheld dêi AstraZeneca kô châ pâk ăm mâu ngế tro tâ pơreăng môi tiah châi kliâm, châi kơkốu, châi plâi nuih, kơxêng, nŭm nheăn, châi xôu pro ôh tá kâi hiâm châi nuih – COPD ƀă hía hé. Ki rơhêng vâ tối cho mâu ngế tro kơdroh trếo mơdât pơreăng tung châ krâ kơvâ ƀă râ xua HIV (dế pơlât châi ŭm tung châ, pơklêp tung châ ƀă hía); lơ tro mâu pơreăng (lupus lo khêi, êi kơxêng, kơxêng pro chiâng tơ-ê ƀă hía hé).

Phá ƀă vaccine, bu tung to lâi chôu klêi kơ’nâi pâk Evusheld, châ hiăng ai tŭm trếo mơdât pơreăng ki kal vâ rak vế ôh tá ăm tro tâ COVID-19 ƀă châ tơƀrê tâk troh 83% ƀă ôh tá ai ngế ki lâi châi râ lơ hlâ tung plâ 6 khế séa ngăn, tiô tơdroăng hriăn plĕng PROVENT dêi AstraZeneca.

A Sa Ly tơplôu ƀă tơbleăng