VOV4.Sêdang - Khu tơrŭm Tơnêi têa nếo tơkŭm po Rôh hôp ‘no tơdrêng ing troăng hyôh Internet a 70 tíu ki xiâm vâ mơnhên tối hnoăng cheăng tơrŭm mơjiâng Đảng hneăng má 3 ƀă tơbleăng hnoăng cheăng mâu khế mơ’nui hơnăm. Pơkuâ po Rôh hôp, jâ Trương Thị Mai, Ngế cheăng tung tíu xiâm kal kí, kăn pơkuâ ngăn Tíu xiâm Đảng, kăn pơkuâ khu tơrŭm Tơnêi têa pơkâ thế tung la ngiâ ah kal mơdêk tơdroăng ki mơhnhôk mâu kăn ƀô̆ ki ai hiâm mơno hơ’lêh nếo, rơkê plĕng, khên tơmiât, khên pêi xua ki pơxúa tơdjuôm.

Jâ Trương Thị Mai xuân tối nhên tơdroăng ki mơdêk hnoăng cheăng séa ngăn hnoăng cheăng tơrŭm mơjiâng dêi rêm râ Đảng, khu tơrŭm Đảng rêm râ, rĕng châ hlo, hnê tơ’nôm, khĕn kơdeăn, po rơdâ mâu ngế ki rơkê plĕng, mâu ngế ki djâ troăng ahdrối, tơdroăng pêi ki tro ‘ló, túa pơkâ nếo, rơkê plĕng tung hnoăng cheăng tơrŭm mơjiâng Đảng.

Kăn xiâm pơkuâ Khu tơrŭm Tơnêi têa pơkâ thế tí tăng ‘nâi plĕng pêi pro tơdrêng hnoăng cheăng ‘na mâu ngế cheăng, rak tơniăn tro tơdroăng pơkâ, hnoăng pơkuâ. Mơjiâng túa pơkâ ƀă pêi klêi tơdroăng séa ngăn dêi tơná, mơnhên tối, xing xoăng ki rơkê plĕng ƀă khu tơrŭm Đảng, đảng viên ƀă khu pú hên, mâu ngế krê kăn ƀô̆ pơkuâ, rak ngăn rêm râ hơnăm 2021.

Katarina Nga tơplôu ƀă tơbleăng