VOV4.Sêdang - Tiô tơdroăng hneăng hôp má 2 Kuô̆k hô̆i hneăng má 15, kơxo lơ 22/10, mâu kăn teăng mâ tơmâng pôa Hồ Đức Phớc, Ngế xiâm pơkuâ liăn ngân, pôu râng hnoăng pơcháu dêi Ngế pro xiâm hnê ngăn Chin phuh tơbleăng Hlá mơ-éa ‘na tơdroăng tơkêa bro Luât tê mơdró ƀaoh hiêm (‘mâi rơnêu) ƀă pôa Nguyễn Chí Dũng, Ngế xiâm pơkâ túa cheăng ƀă mơ’no liăn cheăng, pôu râng hnoăng pơcháu dêi Ngế pro xiâm ngăn Chin phuh tơbleăng Mơ-éa kal tơdroăng pơkâ mâu tơdroăng pơkâ pêi, troăng hơlâ ki phá tơ-ê mơnhông mơdêk dêi mâu kong pơlê, pơlê kong kơdrâm: Hải Phòng, Nghệ An, Thanh Hóa ƀă Thừa Thiên Huế (ki ton 20 phut).

Pơtối mê, Kuô̆k hô̆i tơmâng tơbleăng séa ngăn mâu tơdroăng xiâm kố. Kơxê hnah, môi tung mâu tơdroăng xiâm ki kal châ mâu kăn tơpui tơno a tôh cho tơdroăng pêi pro troăng hơlâ, tơdroăng chêl liăn ƀaoh hiêm pơlê pơla, pơkuâ ƀă xúa Kơxô̆ liăn ƀaoh hiêm pơlê pơla hơnăm 2020. Mâu kăn teăng mâ Kuô̆k hô̆i ƀă mâu ngế rơkê pơrá tối: kal ai troăng vâ mơdêk ki châ tơƀrê xúa mâu kơxô̆ liăn Ƀaoh hiêm pơlê pơla, Ƀaoh hiêm ôh tá ai cheăng pêi nôkố châ troh 953 rơpâu rơtal liăn. Rơtế amê, kal pơxâu phâk kơtăn mâu tơdroăng ví nâp liăn, hrá nâp liăn ƀaoh hiêm pơlê pơla.

A Sa Ly tơplôu ƀă tơbleăng