VOV4.Sêdang - Kơxo lơ 1/11, pôa Lê Văn Thành, Ngế pro xiâm phŏ hnê ngăn tơnêi têa pơkuâ roh hôp mơ’no tơdrêng tung um tiô troăng măng internet ‘na tơdroăng pêi pro tơdroăng tăng tơnêi ƀă mơ’no liăn mơjiâng pro tơdroăng tơkêa bro tơraih tơƀai lâp plâi tơnêi Long Thành, Đồng Nai. Tơbleăng dêi Khu xiâm pơkuâ troăng prôk ƀă rơxế kơtâu tối ăm ‘nâi, troh nôkố tơdroăng tăng tơnêi pro tơraih tơƀai lâp plâi tơnêi Long Thành, tung tâi tâng kơxô̆ 5 rơpâu hectar hiăng xo tơvêh châ lối 3 rơpâu 800 hectar châ vâ chê 77% pơkâ pêi.

Kơchuâ um vâ pro tơraih tơƀai Long Thành

Kơxô̆ liăn mơjiâng pro kơnâng tơkăng châ 75% tơdroăng cheăng. Mơgêi hneăng hôp, pôa Lê Văn Thành tối ăm ‘nâi kố cho tơdroăng tơkêa bro ki kal tung pêi pro troăng pêi ton xŏn ‘na mơnhông mơdêk kơvâ troăng klông. Mâu pơkâ dêi Tơnêi têa pơrá mơnhên kố cho tơmeăm ki xiâm ƀă thế pêi kêi đeăng a hơnăm 2025. Drêng tơraih tơƀai kêi đeăng kô pro ngiâ méa nếo ăm kơvâ tơƀai, kơdroh hâ ho ăm Pơlê kong kân Hồ Chí Minh ƀă cho xiâm kối vâ mơnhông cheăng kâ dêi kơpong, ki má lối cho kong pơlê Đồng Nai.

Xua mê thế pêi kêi đeăng tro tiô pơkâ mơ’no. A ngiâ kơjo kêi đeăng tâi tâng gu tơnêi tiô hlá mơ-éa kơchuâ dêi Khu xiâm pơkuâ troăng prôk ƀă rơxế kơtâu vâ apoăng khế 1/2022 kô pêi pro.

A Sa Ly tơplôu ƀă tơbleăng