VOV4.Sêdang - Pơtối ăm rơkong veăng tơpui tối ‘na mâu tơdroăng ki kal a hneăng hôp má 2, Kuô̆k hô̆i hneăng má 15, hâi lơ 25/10 tơpui tơno a tôh, ăm rơkong veăng tơpui tối ‘na tơdroăng tơkêa Luât Tê mơdró baoh hiâm ki ‘mâi hơ’lêh, Khu kăn Kuô̆k hô̆i kong pơlê Dak Lak môi tuăn khât tơdroăng ki ‘mâi hơ’lêh luât tê mơdró baoh hiâm ƀă Hlá mơéa tối tơbleăng séa ngăn dêi Vi ƀan Cheăng kâ. Tơdrêng a mê, hnối ‘mot tơ’nôm mâu tơdroăng ki kal kố.

Kăn Kuô̆k hô̆i Dak Lak ăm rơkong veăng tơpui tối ‘na Luât tê mơdró Baoh hiâm ki ‘mâi hơ’lêh

Khu kăn Kuô̆k hô̆i kong pơlê Dak Lak tối tiah kố, tơdroăng ki ‘mâi hơ’lêh Luât Tê mơdró baoh hiâm cho kal khât vâ rak vế hnoăng pơxúa tơtro luât dêi khu tơrŭm, mâu ngế krê veăng roê baoh hiâm; mơdêk tơdroăng cheăng tê mơdró baoh hiâm; veăng kum mơdêk ƀă rak vế tơdroăng ki mơnhông krá tơniăn dêi tơdroăng cheăng kâ rêh ối pơlê pơla, tơniăn tơdroăng rêh ối kuăn pơlê; mơdêk tơƀrê rak ngăn tơnêi têa ƀă mâu tơdroăng cheăng tê mơdró baoh hiâm. Laga, hên troăng hơlâ tê mơdró baoh hiâm kal ai pơkâ nhên, tơdrăng.

Katarina Nga tơplôu ƀă tơbleăng