VOV4.Xơ Đăng - Kơxo lơ 20/12, drêng tơbâ 77 hơnăm Hâi mơjiâng Khu lêng kuăn pơlê Việt Nam, pôa Đinh Tiến Dũng, Ngế cheăng tung Khu xiâm pơkuâ tơdroăng kal kí, Kăn pơkuâ ngăn Đảng Pơlê kong kân Hà Nội hiăng troh pôu, rơkâu kăn ƀô̆, lêng Khu xiâm pơkuâ ngăn lêng Pơlê kong xiâm. Tơpui rơkâu, pôa Đinh Tiến Dũng tơmâng xo, khĕn kơdeăn ƀă rơkâu mâu tơdroăng ki hiăng pêi pro klêi ƀă veăng kum dêi kăn ƀô̆, lêng dêi Khu xiâm pơkuâ ngăn lêng Pơlê kong kân tung hơnăm 2021; rơkâu kăn ƀô̆, lêng Khu pơkuâ ngăn lêng Pơlê kong xiâm pêi pro klêi hên tơdroăng, hnoăng cheăng hên tâ nếo, cho tíu hơguân ki loi tơngah, krá rơdêi dêi Đảng ƀô̆, khu kăn pơkuâ ƀă kuăn pơlê Pơlê kong xiâm.

Pôa Đinh Tiến Dũng, kăn pơkuâ ngăn Đảng Pơlê kong kân Hà Nội rơkâu Khu xiâm pơkuâ ngăn lêng Pơlê kong xiâm

Hlo tơdroăng ki tâ tú rơ-iô dêi pơreăng COVID-19, kăn pơkuâ hnê ngăn Đảng pơlê kong kân pơkâ thế Khu xiâm pơkuâ ngăn lêng Pơlê kong xiâm pơtối hbrâ rơnáu mâu túa pơkâ hên tâ nếo, tơrŭm rơtế ƀă mâu khu lêng, hbrâ rơnáu tơkŭm xo, tơdah xo, pơlât mâu ngế ki tâ pơreăng.

Katarina Nga tơplôu ƀă tơbleăng