VOV4.Xơ Đăng - Leh tơbâ 75 hơnăm Hâi lâp tơnêi têa tơplâ xâ lơ 19/12, kơxo lơ 17/12, khu râ kăn teăng mâ pơlê kong kân Hà Nội troh pleăng hơvĭng reăng a Tíu meăn koh tơbâ ‘’Khŏm hlâ vâ Tơnêi têa khŏm rêh’’, kơdrum reăng Hàng Đậu, bêng Quán Thánh, pơlê krâm Ba Đình. Hâi lơ 19/12, 75 hơnăm ngiâ hdrối nah, môi tuăn Rơkong kơbông krếo lâp tơnêi têa tơplâ xâ dêi Pôa Hồ Chí Minh, Kăn xiâm hnê ngăn tơnêi têa hneăng apoăng, khu lêng ƀă kuăn pơlê Hà Nội hiăng têk a ‘ngêi hlá cơ ‘’Khŏm hlâ vâ tơnêi têa khŏm rêh’’, pro rêm kơphô̆, rêm toăng hngêi chiâng tíu vâ tơplâ xâ dêi kuăn pơlê, tâi tâng kuăn pơlê tơplâ xâ.

Nhuô̆m tá hiâm mơno pleăng hơvĭng reăng a Tíu meăn koh tơbâ ‘’Khŏm hlâ vâ Tơnêi têa khŏm rêh’’, - tíu ki tơbâ hnoăng khên tơnôu dêi khu lêng ƀă kuăn pơlê kong xiâm tung 60 hâi măng tơplâ ƀă khu lêng kong têa Pơhlăng mơ’nui hơnăm 1946, apoăng hơnăm 1947, kăn pơkuâ pơlê kong kân tối mơnê hnoăng kân kĭn, tơdroăng ki pleăng dêi châ chăn mơheăm chhá dêi mâu ngoh prôk hdrối, mâu lêng, kuăn pơlê hiăng châ ƀlêi trâng, cho tơdroăng ki phiu ro dêi rêm ngế Hà Nội hâi kố ƀă rơxông kơ’nâi.

Kăn pơkuâ pơlê kong kân tối khŏm pơkuâ Đảng ƀô̆, khu râ kăn pơkuâ, khu lêng ƀă kuăn pơlê Hà Nội pơtối mơnhông khôi túa rŭm môi tuăn, tơdjuôm ivá, môi hiâm mơno mơjiâng ƀă mơnhông mơdêk pơlê kong xiâm tơxâng ƀă hnoăng cho tíu xiâm ki má môi kal kí – pơkuâ tơnêi têa dêi lâp tơnêi.

A Sa Ly tơplôu ƀă tơbleăng