VOV4.Sêdang - Kơxo lơ 23/9, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ po rôh pêi cheăng dêi kăn pơkuâ Kuô̆k hô̆i ƀă khu pơkuâ Vi ƀan cheăng kâ, tơmâng pơchuât mâu tơdroăng ki kal ‘na Túa pơkâ xúa tơnêi hneăng hơnăm 2021 – 2030, ƀă troăng ngăn troh hơnăm 2050, túa pơkâ xúa tơnêi 5 hơnăm 2021 -2025 râ tơnêi têa. Tơpui a rôh pêi cheăng, pôa Vương Đình Huệ, kăn xiâm hnê ngăn Kuô̆k hô̆i tối nhên, tơnêi tơníu cho kong kế ki kal dêi tơnêi têa, xua mê, tơdroăng ki rak ngăn, xúa tơnêi ôh ti xê tơmiât ăm tơdroăng ki pêi pro nôkố mê ối athế tơmiât troh tung la ngiâ.

Tơdrêng amê, tơnêi athế châ ‘mot tơ’nôm tơtro ƀă troăng ngăn ki ton ôh ti xê 5 hơnăm lơ 10 hơnăm mê ối athế ton tâ nếo tung tơdroăng ki mơnhông dêi tơnêi têa. Tiô tơdroăng, Túa pơkâ xúa tơnêi 5 hơnăm, hơnăm 2021 – 2025 kô châ pơtroh ăm Kuô̆k hô̆i a Rôh hôp má 2, Kuô̆k hô̆i hneăng 15. Tiô tối hdrối, tơdroăng kố kô châ Vi ƀan pơkuâ Kuô̆k hô̆i ăm rơkong veăng tơpui tối a rôh hôp má 4 khế 10 hơnăm 2021.

Katarina Nga tơplôu ƀă tơbleăng