VOV4.Sêdang -A pơlê kong xiâm Vienna, Kŏng hoa Áo, pôa Vương Đình Huệ, Kăn xiâm hnê ngăn Kuôk hô̆i hiăng ai roh trâm mâ 6 ngế kăn teăng mâ Việt Nam a châu Âu, mê cho: Kăn teăng mâ Việt Nam a Czëch, kăn teăng mâ Việt Nam a kong têa Slovakia; Kăn teăng mâ Việt Nam a kong têa Hungary; Kăn teăng mâ Việt Nam a kong têa Ba Lan; Kăn teăng mâ Việt Nam a kong têa Áo hlối pro kăn teăng mâ a kong têa Slovenia ƀă Kăn teăng mâ Việt Nam a kong têa Alơmăng.

A roh trâm mâ, mâu kăn teăng mâ hiăng tơbleăng tơdroăng mơngế Việt Nam a mâu kong têa ê ki dế rêh ối pêi cheăng. Ki tơtrŏng má môi cho tơdroăng pơreăng COVID-19 a châu Âu xông tâ tú ó tung hơnăm 2020, xua mê vâi krâ trâm hên pá puât tung tê mơdró ƀă tơdroăng rêh ối. Mâu kăn teăng mâ xuân tối, mâu ngế Việt Nam a mâu kong têa ê ‘nâi plĕng xêh tung hbrâ mơdât pơreăng, đi đo tơmiât troh pơlê xiâm, tơnêi têa, thăm vâ môi tuăn veăng tơlo liăn rôe vaccine hbrâ mơdât pơreăng COVID-19, veăng tơlo liăn kum kuăn pơlê kơpong tro tơdjâk xua kong prâi pro.

Mâu kuăn pơlê a kong têa a Czëch hiăng tơlo liăn rôe vaccine ai 1,5 rơtal liăn, mâu kuăn pơlê a kong têa Alơmăng hiăng tơlo 50 rơpâu euro. Pôa Vương Đình Huệ pơkâ thế mâu Kăn teăng mâ pơtối tơmâng troh tŭm tơdroăng rêh ối, tơdroăng pêi cheăng dêi kuăn pơlê, pơkâ thế mâu kăn teăng mâ pơtối thăm pêi pro tŭm troăng, veăng tơpui tơno lơ rôe vaccine hbrâ mơdât COVID-19.

A Sa Ly tơplôu ƀă tơbleăng