VOV4.Xơ Đăng - Tơpui mơgêi a Hneăng hôp Cheăng kâ Việt Nam 2021, pôa Vương Đình Huệ, kăn xiâm hnê ngăn Kuô̆k hô̆i tối nhên, tơdroăng ki môi tuăn ƀă châ tối hên má môi a Rôh hôp pin athế kơdo mơ-eăm, ai hiâm mơno mơ-eăm xông prôk ƀă kơpeăng chêng dêi tơná, ôh tá la lâi pơtê hơ’lêh ivá rak ngăn tơnêi têa xuân môi tiah ivá rak ngăn khu mơdró kâ; rơtế prôk, ôh ti xê to tơrŭm tung tơnêi têa mê ối mơdêk tơrŭm, tơrŭm ƀă kong têa ê ƀă tung kơpong.

Tiô pôa Vương Đình Huệ, kăn xiâm hnê ngăn Kuô̆k hô̆i tối, vâ teăm tŏng kum mâu tơdroăng ki xơpá, pơkâ tơleăng mâu tơdroăng ki tá hâi tơleăng klêi, mơdêk ‘mâi mơnhông, mơnhông cheăng kâ tung la ngiâ, mâu kơ koan dêi Kuô̆k hô̆i, Chin phuh kal kơhnâ, rĕng hriăn ngăn, séa ngăn tung mâu rơkong tơpui tối dêi mâu tơdroăng ki kơnía git dêi mâu khu ki rơkê plĕng, khu ki hriăn ‘na khoa hok, mâu khu tơrŭm tung tơnêi têa ƀă kong têa ê, mâu khu mơdró kâ vâ pơkâ mâu troăng hơlâ pơkâ teăm tơdrêng ƀă tơtro.

Katarina Nga tơplôu ƀă tơbleăng