VOV4.Xơ Đăng - Kơxo lơ 22/11, a Hngêi hôp Kuô̆k hô̆i, pơxiâm po tơdroăng rôh hôp má 5 dêi Vi ƀan pơkuâ Kuô̆k hô̆i. Po tung pơla 2 hâi, a rôh hôp kố, Vi ƀan pơkuâ Kuô̆k hô̆i ăm rơkong veăng tơpui tối tung hên tơdroăng ki kal, tung mê, ai tơdroăng ki hbrâ ăm hneăng hôp “ôh tá tối hdrối” po a khế 12 la ngiâ.

Tơpui pơxiâm po rôh hôp, pôa Vương Đình Huệ, kăn xiâm hnê ngăn Kuô̆k hô̆i ăm ‘nâi, ki rơhêng vâ tối a rôh hôp kố, Vi ƀan pơkuâ Kuô̆k hô̆i ăm rơkong veăng tơpui tối ‘na tơdroăng ki pâ thế dêi Chin phuh ‘na ‘mot tơ’nôm 2 kơxop hlá mơ-éa luât tung tơdroăng ki mơjiâng luât, luât pơkâ hơnăm 2022, cho: Luât ‘mâi rơnêu, ‘mot tơ’nôm mâu tơdroăng dêi Luât Kơlo hyôh vô tuyến điện; Luât Khăm pơlât, ki ‘mâi rơnêu.

Kăn xiâm hnê ngăn Kuô̆k hô̆i pơkâ thế pêi pro nhên tơdroăng ki kal ’mot tơ’nôm 2 tơdroăng tơkêa Luât, malối cho tơdroăng ki tiô tối hdrối ‘na troăng hơkâ pơkâ kân séa ngăn pơkâ tung 2 tơdroăng tơkêa luât, ‘mâi mơnhông tơdroăng “chêh ‘mot tơ’nôm vâ xing xoăng tíu”.

Katarina Nga tơplôu ƀă tơbleăng