VOV4.Sêdang - Kơxê măng lơ 25/10, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng pơkuâ po rôh pêi cheăng ƀă mâu kơ koan ki ai tơdjâk ‘na hnoăng cheăng kum ăm hneăng hôp má môi,Kuô̆k hô̆i hneăng má 15 tung măng tĭng hôp kố nah. Tơpui a rôh pêi cheăng, pôa Vương Đình Huệ, kăn xiâm hnê ngăn Kuô̆k hô̆i ăm ‘nâi, mâu hâi hdrối kố nah Kuô̆k hô̆i hiăng pêi pro klêi tơdroăng pơkâ mơ’no, xing xoăng tơdroăng hôp tơtro, rơkê, xúa mâu chôu phut tơpui tơno a tôh ƀă a hngêi hôp kân , tâi tâng chêh inâi dêi mâu kăn pơrá châ tơpui.

Kăn xiâm hnê ngăn Kuô̆k hô̆i pơkuâ po rôh pêi cheăng ‘na hnoăng cheăng kum hneăng hôp Kuô̆k hô̆i

Pôa Vương Đình Huệ tối nhên, la ngiâ ah, Kuô̆k hô̆i kô ăm rơkong veăng tơpui tối tung 5 to kơxop hlá mơéa luât ƀă 2 tơdroăng pơkâ ki kân, mê cho vêh pơkâ cheăng kâ ƀă túa pơkâ xúa tơnêi hơnăm 2021 – 2030, troăng ngăn troh hơnăm 2050 ƀă túa pơkâ xúa tơnêi 5 hơnăm, hơnăm 2021 – 2025, kố cho mâu tơdroăng ki tơdjâk troh cheăng kâ kuăn pơlê. Xua mê, mâu kơ koan chêh hlá tơbeăng kal tơbleăng tŭm tơdroăng ki kal; mâu kơkoan dêi Kuô̆k hô̆i kal hriăn ngăn, tơpui tơno nhên,xo rơkong tơpui tối dêi mâu kăn Kuô̆k hô̆i.

Katarina Nga tơplôu ƀă tơbleăng