VOV4.Sêdang - A Hngêi Kuô̆k hô̆i, Tiêuh ƀan kơxô̆ 1, Khu hnê mơhno mâu tơdroăng tơkêa bro ‘’Troăng pêi ton xŏn mơjiâng ƀă kêi đeăng Tơnêi têa tiô luât xah hô̆i chuh ngiah Việt Nam troh hơnăm 2030, tơmiât pêi troh hơnăm 2045’’ tơkŭm po roh tơpui tơno mơngế hriăn plĕng mâu tơdroăng xiâm kum tung mơjiâng tơdroăng hriăn plĕng kêi đeăng luât ƀă tơkŭm pêi pro luât troh hơnăm 2030, tơmiât pêi troh hơnăm 2045. Pôa Vương Đình Huệ, Kăn xiâm hnê ngăn Kuô̆k hô̆i pơkuâ roh hôp tơpui tơno. Xông tơpui a roh hôp tơpui tơno, pôa Vương Đình Huệ tối, kố cho tơdroăng xiâm ki pá, cho tơdroăng tơpui leăng, hriăn plĕng hên, xua mê tơdroăng hnê mơhno mâu ngế hriăn plĕng rơkê cho kal khât.

Xua mê, Kăn xiâm hnê ngăn Kuô̆k hô̆i pói vâ mâu ngế rơkê tơpui tung 3 tơdroăng xiâm môi tiah: troăng prôk la ngiâ môi tuăn mâu tơdroăng; pơkâ ƀă tơdroăng mơjiâng, pêi kêi đeăng luât ƀă tơkŭm pêi pro luât troh hơnăm 2030, troăng prôk la ngiâ troh hơnăm 2045 tơxâng tiô pơkâ mơjiâng, pêi kêi đeăng Tơnêi têa tiô luât xah hô̆i chuh ngiah Việt Nam.

A Sa Ly tơplôu ƀă tơbleăng