VOV4.Xơ Đăng - Klăng roh leh tơbâ 30 hơnăm Hâi mơjiâng kong têa Kŏng hoa Kazakhstan lơ 16/12/1991 – 16/12/2021, teăng mâ Kuô̆k hô̆i Việt Nam ƀă krê tơná, pôa Vương Đình Huệ, Kăn xiâm hnê ngăn Kuô̆k hô̆i hiăng pơtroh kơthô rơkâu troh pôa Maulen Ashimbayev, Kăn xiâm hnê ngăn Kuô̆k hô̆i râ má môi ƀă pôa Nurlan Nigmatulin, Kăn xiâm hnê ngăn Kuô̆k hô̆i râ má péa Kŏng hoa Kazakhstam.

Tung mâu kơthô rơkâu, Kăn xiâm hnê ngăn Kuô̆k hô̆i phiu ro tâ hlo tung mâu hơnăm hiăng hluâ, tơrŭm cheăng tiô khôi hmâ vâi krâ nah ƀă tơrŭm hên tơdroăng pơla Việt Nam – Kazakhstan ƀă tơrŭm pơla Kơ koan mơjiâng luât péa tơnêi têa đi đo châ pro krá tơniăn ƀă mơnhông mơdêk. Kăn xiâm hnê ngăn Kuô̆k hô̆i loi tơngah tung la ngiâ kô pơtối tơrŭm krá tơniăn ƀă Kăn xiâm hnê ngăn Kuô̆k hô̆i râ má môi ƀă Kăn xiâm hnê ngăn Kuô̆k hô̆i râ má péa Kazakhstan vâ thăm pro tơniăn tơrŭm cheăng pơla péa pâ ƀă tơrŭm lĕm tro Việt Nam – Kazakhstan xua pơxúa dêi kuăn pơlê péa tơnêi têa, xua hơniêp lĕm, tơniăn, tơrŭm cheăng, mơnhông mơdêk a kơpong ƀă lâp plâi tơnêi.

A Sa Ly tơplôu ƀă tơbleăng