VOV4.Sêdang - A rôh trâm kăn pơkuâ Ƀơrô cheăng teăng mâ Khu lâp kong têa a Áo, cho jâ Ghada Fathi Waly mê poâ Vương Đình Huệ, Kăn xiâm hnê ngăn Kuô̆k hô̆i tối nhên, Khu lâp kong têa đi đo cho ngế ki kal tung troăng hơlâ tơpui kâ hnối  rơtế ƀă Việt Nam tung hnoăng cheăng mơjiâng ƀă mơnhông mơdêk tơnêi têa, pro tơ’lêi hlâu ăm tơdroăng ki mơnhông, mơdêk hnoăng cheăng, um méa dêi Việt Nam a mâu kong têa ê.

Pôa Vương Đình Huệ, kăn xiâm hnê ngăn Kuô̆k hô̆i mơnhên tối khât Khu lâp kong têa hiăng kum Việt Nam tung hbrâ mơdât pơreăng COVID-19; pơtối kum Việt Nam mơnhông cheăng kâ klêi kơ’nâi ai pơreăng kân, pêi pro ƀă tơdroăng ki ‘mâi mơnhông mâu tơdroăng ki tơdjâk ó dêi COVID-19 ƀă tơdroăng cheăng kâ dêi kuăn pơlê.

Pôa Vương Đình Huệ rơhêng vâ, Khu lâp kong têa pơtối mơdêk hnoăng cheăng tung rak vế hơniâp lĕm ƀă gak kring kong têa ê, mơdêk loi nhuô̆m luât kong têa ê, tŏng kum mâu kong têa, tung mê ai Việt Nam pêi pro tơdroăng ki kal xua tơdroăng mơnhông mơdêk krá tơniăn ton.

Katarina Nga tơplôu ƀă tơbleăng