VOV4.Sêdang - Tiô rơkong krếo thế dêi Kăn xiâm hnê ngăn Kuô̆k hô̆i châu Âu ( EP) David Sassoli, pôa Vương Đình Huệ, kăn xiâm hnê ngăn Kuô̆k hô̆i ƀă khu kăn xiâm Kuô̆k hô̆i tơnêi têa Việt Nam hiăng troh a tơraih tơƀai Melsbroek, Bruxelles, kong têa Ƀih lăm pôu pêi cheăng ƀă Khu kăn Kuô̆k hô̆i châu Âu (EP), Khu tơrŭm châu Âu (EU) sap hâi lơ 8 - 9/9.

Tung hneăng lăm pôu rôh kố troh kong têa Ƀih, pôa Vương Đình Huệ, Kăn xiâm hnê ngăn Kuô̆k hô̆i ai tơpui ƀă Kăn xiâm hnê ngăn Hô̆i đong châu Âu,  kăn teăng mâ mâu kăn Kuô̆k hô̆i dêi Âu tung mâu Vi ƀan ki kal dêi Kuô̆k hô̆i  châu Âu môi tiah, Vi ƀan ‘na tê mơdró kâ lâp plâi tơnêi, kố cho Vi ƀan ai hnoăng cheăng xiâm, mơdêk pêi tơdroăng kĭ tơhrâ ƀă mâu kăn Kuô̆k hô̆i  tơrŭm ƀă ASEAN xuân môi tiah Việt Nam.

Malối, Kuô̆k hô̆i Việt Nam kô rơtế ƀă Vi ƀan ngăn tê mơdró lâp plâi tơnêi dêi Kuô̆k hô̆i châu Âu tơpui tơno, mơjiâng luât pơkâ tơrŭm cheăng vâ mơdêk pêi pro tro tiô luât pơkâ.

Hdrối mê, tung hneăng lăm pêi cheăng veăng hôp to mâu kăn xiâm hnê ngăn Kuô̆k hô̆i lâp plâi tơnêi a Kŏng hòa Áo, pôa Vương Đình Huệ, Kăn xiâm hnê ngăn Kuô̆k hô̆i hiăng ai 3 ƀai pơchuât ki kal a mâu hneăng hôp; hlối trâm mâu kăn xiâm pơla péa pâ ƀă 13 ngế kăn xiâm dêi Kuô̆k hô̆i mâu kong têa ƀă hên ki ê.

Malối cho hiăng tơdah xo hên vaccine, hbrâ mâu pơkeăng, tơmeăm khăm pơlât vâ xúa tung hbrâ mơdât pơreăng COVID-19 ing mâu khu mơdró, kuăn pơlê, mâu ngế a kong têa Áo.

Gương tơplôu ƀă tơbleăng