VOV4.Xơ Đăng - A kơxê lơ 13/12, tung rôh lăm pôu păng ‘nâng Hàn Quốc a pơlê kong xiâm Seoul, pôa Vương Đình Huệ, kăn xiâm hnê ngăn Kuô̆k hô̆i prếi pôa Park Byeong Seug, Kăn xiâm hnê ngăn Kuô̆k hô̆i Hàn Quốc hiăng rơtế veăng hôp a Rôh hôp Khu mơdró kâ Việt Nam – Hàn Quốc. Tơpui a rôh po hôp, pôa Vương Đình Huệ tối nhên, Kuô̆k hô̆i Việt Nam môi tuăn tŏng kum mơdêk tơrŭm cheăng pơla Việt Nam – Hàn Quốc tâk troh a troăng tơrŭm cheăng tung la ngiâ tung tâi tâng.

Rôh hôp kố kô chiâng ivá mơdêk tơrŭm cheăng kâ pơla péa tơnêi têa. Tơbleăng ƀă khu mơdró kâ Hàn Quốc ‘na tơdroăng ki Việt Nam, mâu tơdroăng ki kal ‘na hbrâ mơdât pơreăng COVID-19 ƀă ‘mâi mơnhông cheăng kâ tung la ngiâ, Kăn xiâm hnê ngăn Kuô̆k hô̆i tối nhên tơdroăng cheăng kâ kân dêi Việt Nam xuân dế tơniăn, Chin phuh Việt Nam dế pơkâ tơdroăng ki tâi tâng ‘na hbrâ mơdât pơreăng COVID-19 tiô tơdroăng cheăng tung la ngiâ rơkê, tơniăn, kâi hbrâ mơdât tơƀrê pơreăng. Apoăng hơnăm 2022, Việt Nam kô pơkâ vêh po mâu troăng kơneăng ngi kong têa ê, pro tơ’lêi hlâu ăm mâu khu mơdró kâ prôk lăm, tơrŭm pêi cheăng kâ.

Katarina Nga tơplôu ƀă tơbleăng