VOV4.Xơ Đăng - Kơxê lơ 17/12, a Tíu pêi cheăng Hô̆i đong tơrŭm cheăng tơpui kâ Ấn Độ, pôa Vương Đình Huệ, Kăn xiâm hnê ngăn Kuô̆k hô̆i ƀă khu râ kăn xiâm Việt Nam hiăng veăng Leh tơbâ 5 hơnăm tơrŭm cheăng ton xŏn tŭm têk Việt Nam - Ấn Độ. Ngế xiâm tơpui kâ kong têa Ấn Độ mơnhên Việt Nam ƀă Ấn Độ ai tơrŭm cheăng krá tơniăn, đi đo loi tơngah dêi pó, tơrŭm mơnhông mơdêk tung hên kơvâ cheăng ôh tá bê tơmâng mơhá hên pá puât, pơloăng mơnúa.

Kăn xiâm hnê ngăn Kuô̆k hô̆i veăng Leh tơbâ 5 hơnăm mơjiâng tơrŭm cheăng ton xŏn tŭm têk pơla Việt Nam ƀă Ấn Độ 

Péa tơnêi têa ối hên tơmeăm tơrŭm cheăng tung mâu kơvâ khoa hok, kŏng ngê̆. Péa tơnêi têa xuân hiăng tơrŭm cheăng păng ‘nâng tung mâu kơvâ cheăng tiô khôi hmâ vâi krâ nah môi tiah khôi túa lĕm tro, hnê hriâm hnê mơjiâng ƀă trâm mâ  tơpui tơno pơla kuăn pơlê. Xông tơpui a leh tơbâ, pôa Vương Đình Huệ pơkâ thế péa tơnêi têa tung la ngiâ tơrŭm krá tơniăn pêi pro tơtro Tơdroăng pêi cheăng hơnăm 2021 – 2023 pêi pro tơrŭm cheăng ton xŏn tŭm têk ƀă tơmiât pêi tơdjuôm ‘na hơniâp lĕm, mơnhông mơdêk ƀă kuăn pơlê hiăng châ ăm phêp pêi pro khế 12/2020 vâ đi đo thăm tơrŭm lĕm tro nôkố pơla péa tơnêi.

A Sa Ly tơplôu ƀă tơbleăng