VOV4.Sêdang - Kơxê lơ 8/10, a Hà Nội, pôa Nguyễn Xuân Phúc, Kăn xiâm hnê ngăn tơnêi têa veăng a leh tơdah xo inâi Ngoh khên tơnôu Khu lêng kring vế tơniăn kuăn pơlê ăm Đoân droh rơtăm tŏng xo tơnêi têa Thành Hoàng Diệu; tơdroăng kố cho khĕn kơdeăn mâu ngế ki lĕm, tơdroăng cheăng ki tro kơhnâ ƀă pơ-ôu pơ-eăng kuăn pơlê a pơlê kong xiâm ki kơhnâ rơkê hơnăm 2021 dêi Pơlê kong kân Hà Nội.

Tơdroăng kố châ tơkŭm po tiô tơdroăng ki trâm tơdrêng ƀă ‘no tơdrêng ing troăng hyôh Internet ƀă lối 80 tíu ki tơdjêp tung lâp Pơlê kong kân Hà Nội. Teăng mâ kăn pơkuâ Đảng, Tơnêi têa, kăn xiâm hnê ngăn tơnêi têa cho pôa Nguyễn Xuân Phúc hiăng diâp inâi Ngế khên tơnôu Khu lêng kring vế kuăn pơlê ăm Đoân Droh rơtăm tŏng xo tơnêi têa Thành Hoàng Diệu. Tung tơdroăng ton nah dêi Pơlê kong xiâm Hà Nội, Đoân droh rơtăm tŏng xo tơnêi têa Thành Hoàng Diệu đi đo chôu pâ.

Pơtối rak vế hnoăng cheăng dêi mâu đoân droh rơtăm nah, tung mâu hơnăm hdrối, hơnăm ối nếo Pơlê kong xiâm hiăng pleăng dêi hnoăng tung mâu kơvâ cheăng, veăng kum mơjiâng Pơlê kong xiâm chiâng pơlê kong kân ki bâ eăng, xua hơniâp lĕm, rơpâu hơnăm pleăng. A rôh leh, Pơlê kong kân Hà Nội xuân hiăng khên kơdeăn mâu ngế ki djâ troăng ahdrối mâu tơdroăng pêi ki ‘ló rơkê ƀă ôu eăng 9 ngế kuăn pơlê pơlê kong xiâm ki kơhnâ rơkê tung mâu kơvâ cheăng hơnăm 2021.

Katarina Nga tơplôu ƀă tơbleăng