VOV4.Xơ Đăng - Kơxo lơ 22/11, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa, kăn xiâm hnê ngăn Hô̆i đong cheăng lêng ƀă Gâk kring, pơkuâ ngăn mâu khu lêng kring vế tơniăn kuăn pơlê, diâp Pơkâ to kơlŏng hdrối hâi khế pơkâ sap ing Phŏ Đô đốc Hải quân chiâng Thươ̆ng tươ̆ng ăm pôa Phạm Hoài Nam, Ngế cheăng tung Tíu xiâm Đảng, Ngế cheăng tung khu pơkuâ ngăn Đảng lêng Tơnêi têa, ngế pro xiâm phŏ pơkuâ ngăn lêng.

Kăn xiâm hnê ngăn tơnêi têa diâp pơkâ to kơlŏng Thươ̆ng tươ̆ng ăm ngế pro xiâm phŏ pơkuâ ngăn lêng

Tơpui pơcháu hnoăng cheăng, pôa Nguyễn Xuân Phúc, kăn xiâm hnê ngăn tơnêi têa mơnhên tối, pôa Phạm Hoài Nam cho môi ngế kăn ƀô̆ ai tuăn tơmiât tơniăn, hiâm mơno kâi mơ-eăm, krá tơniăn, hiâm mơno lĕm; châ hnê hriâm tơniăn, chính quy, tơdroăng ki hlê plĕng ƀă ivá rơkê; châ hriâm pât, rơkê plĕng sap ing kong pơlê; ai hên tơdroăng ki rơkê tung pơkuâ, rak ngăn mâu tíu pêi cheăng.

Tung tơdroăng ki pơcháu hnoăng cheăng châ Kăn xiâm pơkuâ ngăn lêng xoăng, kăn xiâm hnê ngăn tơnêi têa pơkâ thế Thươ̆ng tươ̆ng Phạm Hoài Nam pơtối hnê mơhno mơnhông mơdêk kơmăi kơmok ‘na lêng rế hía rế rơkê plĕng, vâ pêi pro tiô tơdroăng ki rơhêng vâ xúa ‘na pháu hnêa, hbrâ rơnáu ‘na mâu kih thuât ăm khu lêng kring vế kơhnâ xúa tung tơdroăng cheăng hơ’lêh kơmăi kơmok, hơ’lêh rơkê dêi tơnêi têa.

Pơtối mơhno tối hiâm mơno khên tơmiât khên pêi, khên pôu râng dêi hnoăng cheăng, khên hơ’lêh, khên pêi pro ƀă tơdroăng ki xơpá pơloăng mơnúa, khên pêi pro xua tơdroăng ki pơxúa tơdjuôm.

Katarina Nga tơplôu ƀă tơbleăng