VOV4.Sêdang - Kơxê lơ 2/11, a kong pơlê Ninh Bình, pôa Nguyễn Xuân Phúc, kăn xiâm hnê ngăn tơnêi têa pêi cheăng ƀă kăn pơkuâ xiâm dêi kong pơlê Ninh Bình ‘na pêi pro troăng hơlâ pơkâ dêi Đảng ƀă luât dêi Tơnêi têa ‘na mơnhông cheăng kâ rêh ối pơlê pơla ƀă cheăng kâ khu pú hên, khu pêi cheăng tơrŭm. Tơpui a rôh pêi cheăng, kăn xiâm hnê ngăn tơnêi têa ai tối tiah kố, pakĭng tơdroăng tŏng kum dêi mâu kong pơlê ăm mâu khu pêi cheăng tơrŭm ‘na kơxô̆ liăn, kơmăi kơmok môi tiah nôkố mê kal tŏng kum ăm mâu khu pêi cheăng tơrŭm ‘na tơdroăng vâ ai túa pơkâ tơkŭm pêi pro rơkê plĕng, tiô túa nếo, tơkâ luâ mâu kơvâ cheăng sap ing tơdroăng tơmiât ‘na túa pơkâ Khu pêi cheăng tơrŭm khôi hmâ.

Kăn xiâm hnê ngăn tơnêi têa pơkâ thế mâu kong pơlê pơtối mơgêi tơdroăng pơkâ 13 dêi Tơnêi têa; tơmâng ngăn tŏng kum mâu troăng hơlâ, liăn cheăng, rôh tơ’lêi hlâu vâ Khu pêi cheăng tơrŭm mơnhông; Tŏng kum liăn hnê cheăng, hnê tối tơdroăng ki rơkê ăm mâu ngế tung khu; Mơhnhôk mâu hngêi rak liăn tê mơdró kum liăn ăm mâu Khu pêi cheăng tơrŭm. Tung tơdroăng ki mê, Kăn xiâm hnê ngăn tơnêi têa pơkâ thế khu xiâm pơkâ ƀă ‘no liăn cheăng, Khu tơrŭm dêi Khu pêi cheăng tơrŭm Việt Nam ƀă mâu kơ koan ki ai tơdjâk tơrŭm ƀă mâu kong pơlê pơtối mơgêi 20 hơnăm pêi pro tơdroăng pơkâ kơxô̆ 13 ‘na cheăng kâ khu pêi cheăng tơrŭm, cheăng kâ khu pú hên.

Katarina Nga tơplôu ƀă tơbleăng