VOV4.Sêdang - Kơxê lơ 14/9, pôa Nguyễn Xuân Phúc, Kăn xiâm hnê ngăn tơnêi têa hiăng pêi cheăng ƀă khu râ kăn pơkuâ Hngêi tơleăng Kuăn pơlê râ xiâm, Ƀơrô Kăn xiâm hnê ngăn tơnêi têa, Khu pơkuâ tơdroăng cheăng Tơnêi têa, Kơ koan séa ngăn hnê arak luât xiâm, Khu xiâm pơkuâ Kŏng an ƀă Vi ƀan Luât dêi Kuô̆k hô̆i ‘na pêi pro Pơkâ pêi dêi kơvâ Tơnêi têa ‘na tơleăng hô sơ mâu ngế xôi kân pơxâu phak ƀă troăng kơdê hlâ tiô tro pơkâ dêi Luât.

Kăn xiâm hnê ngăn tơnêi têa pêi cheăng ƀă mâu kơ koan ‘na tơleăng hô sơ mâu ngế xôi kân tro pơxâu phak ƀă troăng kơdê hlâ

Pôa Nguyễn Xuân Phúc, Kăn xiâm hnê ngăn Tơnêi têa tối nhên hô sơ mâu ngế xôi kân ƀă troăng pơxâu phâk kơdê hlâ cho tơdroăng châ kuăn pơlê ƀă Kuô̆k hô̆i rơhêng vâ ‘nâi plĕng. Xua mê, Hngêi tơleăng xiâm, Kơ koan xiâm séa ngăn hnê arak luât, Khu xiâm pơkuâ Kŏng an ƀă Ƀơrô Kăn xiâm hnê ngăn tơnêi têa pơtối tơrŭm pêi pro Pơkâ pêi dêi kơvâ cheăng Tơnêi têa thăm nhên tâ.

Klêi kơ’nâi roh hôp kố kal thế tơrŭm krá tơniăn tâ tung tơdroăng séa ngăn hô sơ, ôh tá ăm ai xôi drêng tơbleăng pơkâ pro pá puât tung tơdroăng pơxâu phâk. Kăn xiâm hnê ngăn tơnêi têa pơkâ thế tung tơdroăng pêi pro hnoăng cheăng châ pơcháu, mâu kơ koan kal mơgêi, mơnhên xiâm kối vâ ing mê ai troăng mơdât, hbrâ mơdât mâu ngế xôi xuân môi tiah séa ngăn pâ thế ‘mâi rơnêi pơkâ luât ai tơdjâk.

A Sa Ly tơplôu ƀă tơbleăng