VOV4.Sêdang - Kơxo lơ 7/12, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa, Kăn xiâm hnê ngăn Hô̆i đong cheăng lêng ƀă kring tơniăn pơkuâ Roh hôp má môi Hô̆i đong cheăng lêng ƀă kring tơniăn hneăng hơnăm 2021 – 2026. A roh hôp, Hô̆i đong hiăng tơpui tơno, tơpui ‘na tơdroăng tơrŭm pơla mâu khu lêng, Kŏng an ƀă mâu Khu xiâm, kơvâ cheăng, kong pơlê tung hbrâ, mơdât pơreăng COVID-19; thăm ăm khu lêng kuăn pơlê veăng tung khu rak vế hơniâp lĕm dêi Khu lâp kong têa; tơdroăng tơniăn gâk kring măng ƀă tơdroăng tơplâ mơdât tung troăng măng tung rơxông nếo nôkố.

‘Na tơdroăng pêi cheăng hơnăm 2022, Kăn xiâm hnê ngăn tơnêi têa, Kăn xiâm hnê ngăn Hô̆i đong tối rơdêi troh pơkâ ‘nâi nhên tơdroăng, hbrâ mơjiâng troăng pêi ton xŏn, pơkâ pêi tơdâng ƀă tơdroăng kơpong ƀă lâp plâi tơnêi, Kăn xiâm hnê ngăn tơnêi têa pơkâ thế mâu khu tơrŭm cheăng, kơ koan dêi Hô̆i đong mơnhông hnoăng tung tơdroăng tơniăn cheăng lêng, gâk kring dêi tơnêi têa.

Ki rơhêng vâ tối cho hbrâ, mơdât ƀă pơloăng mơnúa gak kring tiô khôi vâi krâ nah tá ahdrối kố ƀă ton xŏn. Rơtế amê cho thăm tơrŭm krá tơniăn cheăng lêng, kring tơniăn ƀă tơpui kâ ƀă kong têa ê, thăm tơpui kâ ƀă kong têa ê kơvâ cheăng lêng, thế rĕng gâk kring Tơnêi têa, gâk kring ing hơngế.

A Sa Ly tơplôu ƀă tơbleăng