VOV4.Xơ Đăng - Hdrối vâ troh hâi Tĭng kân Pâ Xeăng chu chiâng kuăn mơngế hơnăm 2021, koh tơdah hơnăm nếo 2022, kơxo lơ 23/12, pôa Nguyễn Xuân Phúc, Kăn xiâm hnê ngăn tơnêi têa hiăng troh lăm pôu, hbru tơmeăm ƀă hlối rơkâu hâi Tĭng kân Pâ Xeăng chu chiâng mơngế a Tíu xiâm pơkuâ ngăn  khu ƀok xối tiô khôp Pâ Xeăng Hà Nội ƀă Vi ƀan Tơrŭm môi tuăn mâu khu tiô khôp Pâ Xeăng Việt Nam. Lăm pôu Tíu xiâm pơkuâ ngăn khu ƀok xối khôp Pâ Xeăng Hà Nội.

Pôa Nguyễn Xuân Phúc, Kăn xiâm hnê ngăn tơnêi têa rơkâu kơ ƀok xối kân Giuse Vũ Văn Thiên, pơkuâ ngăn Tíu xiâm kơpong Khôp Hà Nội, Kăn xiâm Phŏ chêh tôm xo rơkong Hô̆i đong dêi khu ƀok xối Việt Nam; mâu bok xối, ƀok moan, jâ chĭng ƀă teăng mâ kơpong khôp pâ xeăng, mâu khu ki pleăng tơná chiâng ƀok xối, ƀok moan, jâ chĭng dêi Tíu xiâm pơkuâ ngăn khu ƀok xối tiô khôp Pâ Xeăng Hà Nội tơdah môi rơnó Tĭng kân Pâ Xeăng chu chiâng mơngế tơniăn lĕm, hơniâp ro, rơkâu rêm ngế  ai hên Graxia Pâ Xeăng.

Pôa Nguyễn Xuân Phúc, Kăn xiâm hnê ngăn tơnêi têa lăm pôu, rơkâu Tíu xiâm pơkuâ  ngăn  khu ƀok xối tiô khôp Pâ Xeăng Hà Nội

Kăn xiâm hnê ngăn tơnêi têa tối Đảng, Tơnêi têa đi đo tơmâng rak tơniăn ‘na loi tĭng tiô khôp dêi kuăn pơlê ing tơdroăng pêi pro tro tiô Luât tơnêi têa, Kăn xiâm hnê ngăn tơnêi têa phiu ro hlo, tiô kơ hơnăm, kuăn pơlê tiô khôp Pâ Xeăng rơtế mơnhông mơdêk ƀă kring vế Tơnêi têa; rêh ối lĕm tro ‘na châ ƀă ‘na mơhúa. Mâu kơpong tiô khôp, mâu khu pleăng tơná chiâng ƀok moan, jâ chĭng tơkŭm pêi hên tơdroăng ki lĕm tro ‘na tŏng kum mâu ngế xơpá hliăng tiâ; malối hiăng rơtế veăng mâu khu cheăng plâ mơdât pơreăng COVID-19, pro pơxúa hơniâp tơtô tung hiâm mơno, mơhno um méa ki lĕm tro tung hiâm mơno kuăn pơlê.

Gương tơplôu ƀă tơbleăng