VOV4.Sêdang - Kơxê lơ 6/9, a tíu pêi cheăng dêi Kăn xiâm hnê ngăn tơnêi têa, pôa Nguyễn Xuân Phúc,  Kăn xiâm hnê ngăn tơnêi têa trâm mâ pôa Pranay Verma, Kăn teăng mâ Ấn Độ a Việt Nam. Kăn xiâm hnê ngăn tơnêi têa tối mơnê kơ chin phuh Ấn Độ hiăng veăng kum Việt Nam kơmăi pro chiâng ai oxy ƀă mâu tơmeăm kơmăi xúa tung khăm pơlât. Kăn xiâm hnê ngăn tơnêi têa púi vâ  kăn teăng mâ mơhnhôk dêi Chin phuh Ấn Độ ăm Việt Nam  mung tơdrêng 10 rơtuh klŏng vaccine tung la ngiâ, hlối ăm mâu pơkeăng pơlât COVID - 19 xuân môi tiah mâu tơmeăm xúa tung khăm pơlât ăm Việt Nam. 

Tung la ngiâ, pôa Nguyễn Xuân Phúc, kăn xiâm hnê ngăn tơnêi têa thế kăn teăng mâ tơmâng hnan thế mơdêk tơrŭm pơla péa tơnêi têa. Tung mê, ai pơtối ƀă mơdêk trâm mâ mâu kăn rêm râ ƀă trâm mâ kuăn pơlê; mơdêk pêi mâu pơkâ ki hiăng ai hdrối môi tiah Vi ƀan Tơrŭm cheăng pơla Việt Nam - Ấn Độ ‘na Tơrŭm cheăng kâ, tê mơdró, cheăng khoa hok ƀă kơmăi kơmok, tí tăng ‘nâi plĕng ‘na tơdroăng kal kí  ƀă tơdroăng hôp mơ’no tơdrêng tiô troăng hyoh internet. Péa pâ kal thế tơrŭm  pêi mâu tơdroăng cheăng ai pơxúa khât vâ troh leh tơbâ 50 hơnăm hâi mơjiâng tơrŭm tơpui kâ, mơ-eăm mơdêk tơdroăng  cheăng tơrŭm tung tŭm tơdroăng pơla hơnăm 2021-2023 vâ rế tơ-ƀrê mâu tơdroăng tơrŭm cheăng ki péa pâ vâ môi tuăn.

 Gương tơplôu ƀă tơbleăng