VOV4.Sêdang - Pơtối pêi mâu tơdroăng cheăng a Mih drêng troh tơbâ veăng hôp mâu Kăn Hô̆i đong Khu lâp kong têa hneăng 76 sap hâi lơ 20-25/9/2021, a pơlê kong kân New York, pôa nguyễn Xuân Phúc, Kăn xiâm hnê ngăn tơnêi têa hiăng tơdah mâu vâi pú hmâ Mih, xua jâ Merle Ratner, Ngế pơkuâ xing xoăng tơdroăng cheăng dêi khu tơrŭm cheăng mơhnhôk tŏng kum mâu ngế xơpá tro trếo ‘mêi dioxin Việt Nam a Mih pro ngế xiâm pơkuâ khu kăn.

A rôh trâm mâ, pôa Nguyễn Xuân Phúc, Kăn xiâm hnê ngăn tơnêi têa mơnê mâu vâi pú Mih hiăng veăng kum hiăng pêi hên tơdroăng ki pơxuá tung veăng kum mâu ngế tro trếo ‘mêi dioxin, tro ƀom mìn ki u ối hâi pơtôu tung roh tơplâ Việt Nam.

Kăn xiâm hnê ngăn tơnêi têa tối lối 25 hơnăm tơrŭm cheăng pơla Việt Nam - Mih hiăng rế hlo trâu rơdâ, tơ-ƀrê tâ, krá tơniăn ton; tung mê, khĕn kơdeăn khât  tơdroăng tơhrâ veăng kum dêi Mih ‘na kum tơdroăng trâm pá  xua tơdroăng tơplâ, veăng ‘no hnoăng kân tung tơdroăng mơjiâng tuăn loi ƀă ‘nâi mơ-eăm ôh tá la lâi pơtê ing péa pâ.

Kăn xiâm hnê ngăn tơnêi têa tối púi vâ  vâi pú hmâ ƀă Mih pơtối veăng kum tơrŭm cheăng pơla péa tơnêi têa, malối cho tơdroăng tơleăng mơnhên ‘na tro trếo ‘mêi dioxin.

Gương tơplôu ƀă tơbleăng