VOV4.Xơ Đăng - Pôa Nguyễn Xuân Phúc, Kăn xiâm hnê ngăn tơnêi têa nếo ai kơthô kheăn kơdeăn Tổng Liên đoân pêi cheăng Việt Nam ‘na tơdroăng mơhnhôk ƀă pêi pro châ tơƀrê Tơdroăng ‘’75 rơpâu troăng tơmiât rơkê, tơkâ hluâ pá puât, mơnhông mơdêk’’ a roh leh tơbâ 75 hơnăm Hâi lâp plâi tơnêi pêi cheăng a Việt Nam. Tơdroăng mơhnhôk tung đoân viên kŏng đoân, kŏng nhân, kŏng chưk, viên chưk, mơngế pêi cheăng dêi mâu râ, mâu kơvâ cheăng, mâu kơ koan, tíu cheăng, khu tê mơdró tung lâp tơnêi têa.

Kăn xiâm hnê ngăn tơnêi têa mơnhên, ‘’75 rơpâu troăng tơmiât rơkê, tơkâ hluâ pá puât, mơnhông mơdêk’’ cho tơdroăng ki pơxúa xua mơngế pêi cheăng pêi kâ cho xiâm kối mơjiâng tơmeăm khoăng ƀă tơdroăng ki mơnhông mơdêk dêi tơnêi têa. Tơdroăng kố kum mơhnhôk mơjiâng khôi túa nếo tung kơ koan, tíu cheăng, khu tê mơdró: rêm mâu ngế pêi cheăng kơhnâ pêi cheăng, pêi tá hiâm mơno, tơmiât troăng pêi, veăng kum tung mơnhông mơdêk dêi khu tơrŭm cheăng tíu tơná pêi cheăng.

Kăn xiâm hnê ngăn tơnêi têa tối loi tơngah ƀă rơkâu Tổng Liên đoân pêi cheăng Việt Nam pơtối mơnhông mơdêk tơdroăng ‘’75 rơpâu troăng tơmiât pêi rơkê, tơkâ hluâ pá puât, mơnhông mơdêk’’, pơtối ai hên tơdroăng ki pơxúa ƀă troh lâp lu rơdâ, kum pro châ péa xôh tơdroăng ki loi tơngah ƀă tơdroăng pói vâ mơ-eăm ăm môi tơnêi têa Việt Nam ó rơdêi, hơniâp lĕm.

A Sa Ly tơplôu ƀă tơbleăng