VOV4.Sêdang - Pơtối mâu tơdroăng cheăng a New York, Mih, kăn xiâm hnê ngăn tơnêi têa pin hiăng ai mâu rôh trâm, tơpui tơno ƀă mâu kăn xiâm pơkuâ mâu kong têa, trâm ‘no tơdrêng ing troăng hyôh internet, kăn xiâm hnê ngăn Kuô̆k hô̆i Mih. Pôa Nguyễn Xuân Phúc, kăn xiâm hnê ngăn tơnêi têa pin xuân hiăng ai rôh tơpui tơno ƀă kăn teăng mâ dêi mâu kong têa cho mâu kong têa cheăng dêi Hô̆i đong kring vế khu lâp kong têa. Tơpui tơno ƀă kăn teăng mâ dêi khu tơrŭm kong têa Rusi, pôa Nguyễn Xuân Phúc tối nhên, Rusi cho môi tung mâu kong têa tơrŭm cheăng ki kal xiâm dêi Việt Nam. La ngiâ kố ah, kăn pơkuâ péa kong têa kô rĕng ai mâu rôh tơpui tơno tơdrêng vâ mơdêk tâ nếo tơrŭm cheăng la ngiâ pơla Việt Nam ƀă kong têa Rusi.

Tung rôh tơpui tơno ƀă pôa Antony Blinken, ngế xiâm tơpui kâ kong têa Mih, pôa Nguyễn Xuân Phúc mơnê Mih dế cho môi tung mâu kong têa kum vaccine hbrâ tơplâ mơdât pơreăng COVID-19 hên má môi ăm mâu kong têa ing troăng hơlâ COVAX. Hdrối mê, pôa Nguyễn Xuân Phúc hiăng ai rôh trâm jâ Máxima, kơdrâi pơtáu kong têa Hà Lan, teăng mâ dêi kăn xiâm chêh tôm xo rơkong khu lâp kong têa ‘na liăn ngân; tơdah jâ Kristalina Georgieva, kăn xiâm pơkuâ Khu râng liăn lâp plâi tơnêi IMF, ƀă hên khu mơdró kâ xiâm a kong têa Mih.

Katarina Nga tơplôu ƀă tơbleăng