VOV4.XơĐăng - Hâi lơ 28/12, a Đà Nẵng, pôa Nguyễn Xuân Phúc, Kăn xiâm hnê ngăn tơnêi têa veăng hôp a rôh hôp tơpui tơno Pơlê kong kân Đà Nẵng: Ƀlêi chiâng ƀă loi tơngah. Tiô tối tơbleăng dêi Pơlê kong kân, sap ing rôh ki chiâng pơlê kong kân ối tung Tơnêi têa hơnăm 1997 nah troh nôkố, Đà Nẵng hiăng chiâng tíu xiâm ‘na cheăng kâ kơpong peăng tơdế Tơnêi têa. Mâu tơdroăng ki ƀlêi chiâng mê klêi kơ’nâi 25 hơnăm hdrối nah cho ivá hơ’lêh dêi tơná ó rơdêi, cheăng kâ pơtối mơdêk.

Drêng tá hâi trâm xơpá xua pơreăng, hơnăm 2019, túa pơkâ cheăng dêi Đà Nẵng châ vâ chê 69.500 rơtal liăn, pêi lo liăn rêm ngế lối 97 rơtuh liăn tung môi hơnăm. Maluâ trâm xơpá xua pơreăng kân COVID-19, hơnăm kố, túa pơkâ cheăng dêi kong pơlê tiô riân châ vâ chê 64 rơpâu rơtal liăn. Pơlê kong kân xuân hiăng ai tơdroăng ki hơ’lêh rơdêi vâ mơnhông.

Tơpui a rôh hôp tơpui tơno, kăn xiâm hnê ngăn tơnêi têa pơchân Đà Nẵng pôi tá chiâng ngăn tơdroăng ki hiăng tơƀrê ah ôh tá vâ mơ-eăm xếo mê athế kal tơkŭm mơnhông kơxô̆ liăn kuăn mơngế vâ ‘mâi mơnhông cheăng kâ mơnhông tơtêk. Đà Nẵng kal mơnhông chiâng tíu xiâm tê mơdró ƀă kong têa ê, tíu troh ki hơniâp ro dêi mâu khu ‘no liăn cheăng, tơmối; cho môi ivá mơ-eăm, cho tíu xiâm veăng kum ôh ti xê to ki rơdêi mơdêk cheăng kâ dêi lâp tơnêi têa, mê ối cho môi tơdroăng pơkâ ƀă tơdroăng ki hâk tơngăm ‘na ivá mơ-eăm dêi tơná tơkâ luâ xơpá, mơ-eăm xông tơtêk tơƀrê dêi Việt Nam.

Katarina Nga tơplôu ƀă tơbleăng