VOV4.Sêdang - Tiô rơkong krếo thế dêi kăn xiâm pơkuâ kong têa Kenya, Kăn xiâm hnê ngăn ki pơ’lêh dêi Hô̆i đong kring vế Khu lâp kong têa khế 10/2021, kơmăng lơ 28/10, pôa Nguyễn Xuân Phúc, Kăn xiâm hnê ngăn tơnêi têa veăng hôp hlối tơpui a hneăng hôp tơpui tơno to khu râ kăn mơ’no tơdrêng tiô troăng hyôh măng internet ‘na tơrŭm cheăng pơla Khu lâp kong têa ƀă Khu tơrŭm châu Phi (AU) pơxá “Mơdêk tơrŭm môi tuăn xua hơniâp lĕm ƀă tơniăn tung tơdroăng ki tơplâ dêi rơpó dế châ pơ’lêh”.

Tơdroăng ki pôa Nguyễn Xuân Phúc, Kăn xiâm hnê ngăn tơnêi têa veăng hôp tơpui tơno mê mơhno hnoăng cheăng, hnoăng veăng ‘no, hnoăng pêi pro dêi Việt Nam tung mơdêk tơrŭm cheăng pơla Khu lâp kong têa ƀă mâu khu tơrŭm tung kơpong, hlối pơtối mơhno hnoăng pêi ki châ tơ-ƀrê tung khế Việt Nam pro kăn xiâm hnê ngăn Hô̆i đong Kring vế Khu lâp kong têa tối ‘na mâu hnoăng ki mơ-eăm mơnhông mơdêk ƀă tơrŭm lâp plâi tơnêi dêi Châu Phi tung pơla hdrối nah, hlối tối tơdroăng ki xơpá, pơloăng mơnúa  tung kring vế tơniăn tiah hmâ, ƀă tơdroăng ki ôh tá hmâ ki Châu Phi nôkố dế trâm, malối cho mâu tơdroăng tơdjâk ki ‘mêi rơtâ táu tơdroăng ki ôh tá tơniăn, pơkeăng kân COVID-19.

Gương tơplôu ƀă tơbleăng