VOV4.Xơ Đăng -  Kơxo lơ 8/12, kong pơlê Hà Giang tơkŭm po leh tơbâ 130 hơnăm hâi mơjiâng kong pơlê lơ (20/8/1891 – 20/8/2021), 30 hơnăm  pơtối mơjiâng kong pơlê ƀă 60 hơnăm Pôa Hồ lăm pôu Hà Giang. Pôa Nguyễn Xuân Phúc, Kăn xiâm hnê ngăn tơnêi têa veăng leh tơbâ hiăng tối kơpong tơnêi Hà Giang cho tíu ki tơplâ tíu ki tơviah, tíu tơkăng kong xiâm tơnêi têa. Ing tơdroăng dêi kuăn pơlê Hà Giang xuân cho ing tơdroăng môi tuăn dêi hdroâng mơngế Việt Nam.

Ƀă tơdroăng pơkâ mơnhông mơdêk Hà Giang ai pơkâ a hneăng Hôp Đảng ƀô̆ kong pơlê roh má 17, mê cho mơjiâng Hà Giang chiâng kong pơlê ki mơnhông mơdêk ‘na ôm hyô, tê mơdró, ƀă pêi chiâk pêi lo kế tơmeăm ki vâ tê mơdró, troh hơnăm 2030 cho kong pơlê ai tơdroăng cheăng kâ - rêh ối mơnhông mơdêk krá tơniăn tung kơpong kong ngo peăng kơnhŏng tơnêi têa; troh hơnăm 2045 cho kong pơlê kô ai tơdroăng cheăng kâ - rêh ối vâ tối chiá hôm dêi lâp tơnêi têa, pôa Nguyễn Xuân Phúc, Kăn xiâm hnê ngăn tơnêi têa pơkâ thế: Kong pơlê thế pơtối tăng tuá pêi cheăng ƀă mơ-eăm mơnhông cheăng kâ túa ki nếo ing tơdroăng pơtối rak vế tơmeăm khoăng ki hiăng ai hlâu ƀă ki krê xêh  akố, pêi ahdrối mâu luât pơkâ mơnhông tung rêh ối, pêi tơdroăng tŏng kum săm kơtiê, mơdêk ‘no liăn mơjiâng tơmeăm khoăng mơnhông hnê hriâm, khăm pơlât,  kum tơdroăng ki pro pơxúa ăm mâu kuăn pơlê.