VOV4.XơĐăng - Kơxo lơ 29/12, a Hà Nội, Khu rak ngăn tíu ‘măn poăng Pôa Hồ Chí Minh tơkŭm po leh tơdah xo Mê dai pêi cheăng ối má Péa; mơgêi hnoăng cheăng hơnăm kố ƀă tối tơbleăng hnoăng cheăng tung hơnăm la ngiâ. Jâ Võ Thị Ánh Xuân, kăn xiâm phŏ hnê ngăn tơnêi têa veăng a rôh leh. Tung pơla hdrối kố nah, Khu rak ngăn Tíu ‘măn poăng Pôa Hồ Chí Minh hiăng pêi klêi hnoăng cheăng châ pơcháu, châ Hồ Chí Minh klêi kơ’nâi 50 hơnăm châ rak vế krâu, tá hâi hlo ai mâu tơdroăng ki hơ’lêh ki lâi tâng vâ pơchông ƀă mâu tơdroăng ki chêh tối tung hlá mơ-éa séa ngăn châ dêi mâu Hô̆i đong hdrối nah.

Sap ing hâi lôu péa Tíu ‘măn poăng Pôa troh nôkố, tíu pêi cheăng kố hiăng tơdah krâu, rak tơniăn 324 rôh pôu ngăn râ tơnêi têa, 427 khu kăn pơkuâ tơnêi têa hneăng hdrối ƀă vâ chê 60 rơtuh ngế kuăn pơlê, tung mê ai lối 10 rơtuh ngế tơmối kong têa ê troh pôu ngăn tíu ‘măn poăng pôa Hồ. Teăng mâ kăn pơkuâ Đảng, Tơnêi têa, jâ Võ Thị Ánh Xuân hiăng diâp Mê dai Pêi cheăng ối má Péa ăm Khu rak ngăn tíu ‘măn poăng Pôa Hồ, kăn xiâm hnê ngăn tơnêi têa pin hneăng hdrối.

Katarina Nga tơplôu ƀă tơbleăng