VOV4.Xơ Đăng - Kơxo lơ 26/11, a tíu pêi cheăng Chin phuh, jâ Võ Thị Ánh Xuân, Kăn xiâm phŏ hnê ngăn tơnêi têa hôp Hô̆i đong Tŏng kum Kơxô̆ liăn tŏng kum vâi hdrêng Việt Nam. Sap apoăng hơnăm troh nôkố, Kơxô̆ liăn tŏng kum vâi hdrêng Việt Nam hiăng tŏng kum lối 98 rơpâu roh ngế vâi hdrêng ƀă kơxô̆ liăn lối 61 rơtal liăn. Tung mê hiăng tơkŭm po khăm rah mâu ngế châi plâi nuih sap ing pơxiâm kot mâ, chó chêng tơvê kŏng, pơreăng a mâ ăm 1 rơpâu 200 ngế vâi hdrêng mơngế hdroâng kuăn ngo, vâi hdrêng ối tung rơpŏng kơtiê, vâ chê kơtiê kơpong kong ngo.

Kơxô̆ liăn tŏng kum vâ chê 6,9 rơtal liăn, ƀă lối 20 rơpâu ngế vâi hdrêng châ kum. Ki rơhêng vâ tối tơdjâk troh pơreăng COVID-19, Khu pơkuâ râng liăn hiăng tŏng kum lối 18 rơtal liăn ăm lối 14 rơpâu ngế vâi hdrêng. Mâu ngế ki tơdah tŏng kum cho vâi hdrêng ai tơdroăng rêh ối pá puât lơ vâi hdrêng ối tung rơpŏng kơtiê, rơpŏng vâ chê kơtiê, vâi hdrêng cho kuăn ‘nĕng dêi kŏng nhân, kuăn pơlê pêi chiâk deăng hía cheăng pêi ƀă vâi hdrêng ai nôu tro tâ COVID-19.

Jâ Võ Thị Ánh Xuân a roh hôp hiăng kơbông krếo mâu khu tơrŭm tung Hô̆i đông tŏng kum mơnhông mơdêk tâ nếo hnoăng dêi tơná vâ mơhnhôk khu râ tro má môi tŏng kum ăm vâi hdrêng ai tơdroăng rêh ối pá puât.

A Sa Ly tơplôu ƀă tơbleăng