VOV4.Sêdang - Kơxê lơ 5/11, pôa Phan Đình Trạc, kăn xiâm pơkuâ cheăng Tơnêi têa rơtế ƀă khu kăn ki pêi dêi hnoăng cheăng dêi Khu xiâm pơkuâ tơdroăng kal kí hiăng pêi cheăng ƀă Khu pơkuâ ngăn Đảng pơlê kong kân Đà Nẵng séa ngăn tơdroăng ki tối tơbleăng, pêi pro hơ’lêh ƀă tơbleăng pêi pro tơdroăng pơkâ Hneăng hôp Đảng lâp tơnêi têa rôh má 13 dêi Đảng.

Tiô inâi ƀă tơdroăng pơkâ séa ngăn, Khu kăn séa ngăn kô séa ngăn túa pơkâ dêi Khu xiâm pơkuâ tơdroăng kal kí hiăng pơkâ, pơxiâm sap ing hâi môi măng tĭng la ngiâ, Khu kăn kô pêi cheăng ƀă mâu khu kăn pơkuâ ngăn Đảng ối tung khu pơkuâ ngăn Đảng pơlê kong kân Đà Nẵng môi tiah Đảng ủy Ƀơrô cheăng Đảng pơlê kong kân, Khu pơkâ ƀă ‘no liăn cheăng, Khu ngăn kong pơlê ƀă hnoăng cheăng mâu kăn ƀô̆, Khu ngăn kong prâi tơnêi tíu, Đảng ủy Kŏng ti xiâm Ngũ Hành Sơn.

Kăn xiâm pơkuâ cheăng Tơnêi têa pêi cheăng ƀă Khu pơkuâ ngăn Đảng ủy Đà Nẵng

Tung hơnăm kố, Đà Nẵng cho môi tung 10 tíu pêi cheăng tung lâp tơnêi têa châ Khu xiâm pơkuâ tơdroăng kal kí rah xo tơkŭm po séa ngăn tơdroăng ki pơkuâ, hnê mơhno hnoăng cheăng hriăn ngăn, hriâm tâp, tối tơbleăng ƀă pêi pro hơ’lêh tối tơbleăng pêi pro tơdroăng pơkâ Hneăng hôp 13 dêi Đảng.

Katarina Nga tơplôu ƀă tơbleăng