VOV4.Sêdang - Veăng tung hneăng hôp má 2, Kuô̆k hô̆i hneăng má 15 ‘no tơdrêng ing troăng hyôh internet, klêi kơ’nâi hmâng tối tơbleăng ‘na Klêi kơ’nâi pêi pro túa pơkâ Mơnhông cheăng kâ rêh ối pơlê pơla hơnăm 2021; tiô tối hdrối túa pơkâ mơnhông cheăng kâ rêh ối hơnăm 2022. Hlá tơbleăng tơbleăng ‘na hnoăng cheăng hbrâ mơdât pơreăng COVID-19 ƀă tơdroăng pêi pro tơdroăng pơkâ kơxô̆ 30/2021/QH15 ‘na hneăng hôp má môi, Kuô̆k hô̆i hneăng má 15, Khu kăn Kuô̆k hô̆i kong pơlê Dak Lak hiăng mơdoh chôu tơpui tơno a tôh mâu tơdroăng ki kal kố.

Mâu kăn a Dak Lak tối môi tuăn ƀă tơdroăng ki tối tơbleăng ƀă tiô tối hdrối túa pơkâ mơnhông cheăng kâ rêh ối pơlê pơla tối a hneăng hôp, tơdrêng amê hnối ai rơkong veăng tơpui tối ‘na kơlo ki tro tơdjâk dêi pơreăng COVID-19 troh kuăn pơlê, malối cho tơdroăng ki tơmâng ngăn vâi hdrêng tro nôu pâ hlâ lêk xua tâ pơreăng; tơdroăng ki tơbleăng kơxô̆ liăn ‘no cheăng tơdjuôm nôkố tung lâp tơnêi têa hrá ƀă xiâm kối ki ôh tá vâ tơmâng cho xua ing troăng hơlâ trâm hên tơvâ tơvân.

Katarina Nga tơplôu ƀă tơbleăng