VOV4.Sêdang - Hâi lơ 7/10, a tíu xiâm tơdjêp Pơlê kong kơdrâm Đà Lạt, Khu kăn Kuô̆k hô̆i kong pơlê Lâm Đồng hiăng tơkŭm po rôh trâm kuăn pơlê khô̆i kơ koan, tíu pêi cheăng, khu tơrŭm Đảng, khu kăn pơkuâ, Măt trâ̆n Tơnêi têa Việt Nam kong pơlê ƀă mâu tơring Lạc Dương, Đơn Dương, Đức Trọng tiô tơdroăng ki trâm tơdrêng ƀă ‘no tơdrêng ing troăng hyôh internet.

A rôh trâm kuăn pơlê, mâu kăn Kuô̆k hô̆i hiăng tơbleăng tơdroăng kal troh kuăn pơlê Lâm Đồng ‘na mâu tơdroăng ki kal dêi hneăng hôp má 2, Kuô̆k hô̆i hneăng má 15 tiô tối hdrối kô po sap ing hâi lơ 20/10 troh 13/11 la ngiâ, tối tơbleăng ‘na tơdroăng cheăng kâ rêh ối pơlê pơla dêi kong pơlê ƀă dêi lâp tơnêi têa tung 9 khế apoăng hơnăm ƀă túa pơkâ 3 hơnăm mơ’nui hơnăm 2021.

Pôa Trần Đình Văn, phŏ pơkuâ ngăn Đảng ủy, kăn pơkuâ Khu kăn Kuô̆k hô̆i kong pơlê Lâm Đồng hiăng tơmâng rơkong tơpui, pâ thế dêi kuăn pơlê.

Pakĭng tơdroăng ki tối loi tơngah, tơmâng ngăn dêi Đảng, Tơnêi têa, Chin phuh tung mơdêk cheăng kâ rêh ối pơlê pơla, hbrâ mơdât pơreăng COVID-19, kuăn pơlê, kong pơlê Lâm Đồng ai tối hên tơdroăng kal pơtối pơkâ tơleăng ‘mâi rơnêu. Mê cho hnoăng cheăng rak ngăn kong ối hlo tá hâi krá tơniăn, kế tơmeăm vâ tê ối xơpá, pêt mơjiâng kế tơmeăm tiô troăng hưh cơ mơdêk ki kơnía dêi mâu kế tơmeăm, tơdroăng ki mung xo liăn rơkâ hên xuân ối hlo hên hĭn a mâu kơpong thôn pơlê, mơni pơreăng COVID-19 tơ’lêi tâ tú a mâu kơchơ kân ƀă ngế ki vê rơxế pơto chơ kế tơmeăm ing troăng ki xŏn ƀă hên ki ê.

Nga tơplôu ƀă tơbleăng