VOV4.Sêdang - Pêi pro tiô tơdroăng ki séa ngăn dêi Khu xiâm pơkuâ tơdroăng kal kí ƀă Khu pơkuâ ngăn Đảng hơnăm 2021, kơxê lơ 7/12, a tíu pêi cheăng Chin phuh, Khu kăn séa ngăn dêi Khu xiâm pơkuâ tơdroăng kal kí pêi cheăng ƀă Khu pơkuâ ngăn Đảng Chin phuh ‘na klêi kơ’nâi pơkuâ, hnê mơhno tơdroăng ki hriăn ngăn, hriâm tâp, séa ngăn kơtăng, tối tơbleăng, pêi pro hơ’lêh ƀă tơbleăng pêi pro Tơdroăng pơkâ Hneăng hôp khu kăn lâp tơnêi têa rôh má 13 dêi Đảng.

Pôa Phạm Minh Chính, Ngế pro xiâm hnê nghăn Chin phuh; pôa Phan Đình Trạc, kăn pơkuâ ngăn Tíu xiâm Đảng, kăn xiâm tí tăng ‘nâi plĕng Tơnêi têa, kăn xiâm Khu khu kăn séa ngăn dêi Khu pơkuâ tơdroăng kal kí, rơtế po rôh pêi cheăng. A rôh pêi cheăng, pôa Phan Đình Trạc ăm ‘nâi, Khu kăn kố kô tơkŭm séa ngăn hnoăng cheăng pơkuâ, hnê mơhno, hriăn ngăn, hriâm tâp, séa ngăn kơtăng, hnê tối hơ’lêh nhên ƀă tơbleăng pêi pro tơdroăng pơkâ Hneăng hôp 13 dêi Đảng.

Pôa Phạm Minh Chính tối nhên, séa ngăn pêi pro cho môi tung mâu túa pơkuâ dêi Đảng, Chin phuh hlo kố cho tơdroăng ki kal vâ pêi pro troăng hơlâ pơkâ dêi Đảng, pơkâ dêi luât, hnê mơhno dêi mâu kăn pơkuâ Đảng, Tơnêi têa, khu ki tơdjâk, hnoăng cheăng, hâi khế châ pơcháu pêi pro rơkê má môi.

Katarina Nga tơplôu ƀă tơbleăng