VOV4.Xơ Đăng - Tơdjâk troh tơdroăng ki mơdêk yă séa ngăn COVID-19 dêi Kŏng ti Tơlo liăn Công nghệ Việt Á (Kŏng ti Việt Á), kơxo lơ 21/12, pôa Nay Phi La, kăn pơkuâ Khu ngăn pơkeăng ƀă khăm pơlât kong pơlê Dak Lak tối nhên, kong pơlê hiăng roê lối 20 rơpâu to kit séa ngăn COVID-19 sap ing Kŏng ti kố, yă 370 rơpâu liăn tung 1 to kit. Tung pơla roê châ pêi pro tro tiô tơdroăng pơkâ, ôh tá ai tơdroăng klâi.

Khu ngăn pơkeăng ƀă khăm pơlât kong pơlê Dak Lak tối nhên ôh tá ai tơdroăng oh tá tro tung tơdroăng ki roê kit séa ngăn rĕng Việt Á

‘Na tơdroăng ki chêh pro hlá mơ-éa roê, pôa Nay Phi La tối nhên: Tơdroăng ki roê kit séa ngăn COVID-19 a kong pơlê pơrá châ CDC chêh túa pơkâ. Pơtối mê, tíu pêi cheăng pơtroh ăm Khu ngăn pơkeăng ƀă khăm pơlât mê Khu ngăn pơkeăng ƀă khăm pơlât pơtroh ăm Vi ƀan hnê ngăn kong pơlê Dak Lak kĭ pơkâ. Klêi mê, CDC Dak Lak mung tíu pêi cheăng chêh pro pơkâ yă tê mê nếo pơtroh ăm Khu ngăn liăn ngân séa ngăn pơkâ. Pơtối mê, hồ sơ châ pơtroh ăm Khu ngăn pơkâ ƀă ‘no liăn cheăng vêh séa ngăn tơdroăng mê CDC nếo roê. Mâu tơdroăng pêi pro tơtro tiô tơdroăng pơkâ nôkố.