VOV4.Sêdang - Kơxo lơ 14/10, Khu pơkuâ Đảng ƀô̆ Pơlê kong kân Hồ Chí Minh tơkŭm po Hneăng hôp roh má 9. Xông tơpui pơxiâm po, pôa Nguyễn Văn Nên – Kăn cheăng tung Khu xiâm kal kí, Kăn pơkuâ hnê ngăn cheăng Đảng pơlê kong kân tối ăm ‘nâi, tung 9 khế hơnăm 2021, tơdroăng pơreăng xông tâ tú râ ó, pơlê kong kân thế pêi pro klâ kơtăn pơlê pơla tung môi pơla chía ton. Tơdroăng kố tơdjâk tâi tâng ƀă trâu hơngế troh tơdroăng cheăng kâ ƀă mơhno túa lĕm tro, rêh ối pơlê pơla dêi pơlê kong kơdrâm.

Khu pơkuâ Đảng ƀô̆ Pơlê kong kân Hồ Chí Minh tơkŭm po Hneăng hôp roh má 9

Tâi tâng kơvâ tro tơdjâk, hên kơxô̆ mơhno tro kơdroh trâu, tung mê GRDP 9 khế kơdroh 4,98%. Troh nôkố, Pơlê kong kân Hồ Chí Minh hiăng kâi mơdât pơreăng. Laga, pơlê kong kân thế pơtối mơ-eăm hên tâ mê nếo vâ pêi pro pơkâ 128 dêi Chin phuh ƀă hnê mơhno dêi Khu xiâm ngăn pơkeăng ƀă khăm pơlât ‘na troăng pêi pơtân tơniăn, ƀeăn ƀĕng, mơdât châ tơƀrê pơreăng COVID-19.

Pơla kố nah, pôa Nguyễn Xuân Phúc, Kăn xiâm hnê ngăn tơnêi têa hiăng kheăn kơdeăn tơdroăng mơ-eăm tung hbrâ mơdât pơreăng ƀă tối mâu tơdroăng ki kal rơnêu tung la ngiâ.

A Sa Ly tơplôu ƀă tơbleăng