VOV4.Xơ Đăng - A kơxê lơ 22/11, Vi ƀan pơkuâ Kuô̆k hô̆i ăm rơkong tơpui tối ‘na mơgêi hneăng hôp má 2 ƀă ăm rơkong tơpui tối ki apoăng ‘na tơdroăng ki hbrâ ăm hneăng hôp ôh tá tối hdrối ƀă hneăng hôp má 3, Kuô̆k hô̆i hneăng má 15. A rôh hôp, pôa Vương Đình Huệ, kăn xiâm hnê ngăn Kuô̆k hô̆i pơkâ thế tơkŭm po rế rĕng rế tro hneăng hôp ki ôh tá tối hdrối ƀă 5 tơdroăng ki kal tơdjâk troh “tơdroăng kân dêi kuăn pơlê”.

Tiô pôa Bùi Văn Cường, ngế kăn chêh tôm xo rơkong Kuô̆k hô̆i: Hneăng hôp ôh tá tối hdrối kố po tiô tơdroăng ki ‘no tơdrêng ing troăng hyôh internet, tiô tối hdrối hâi chôu tơkŭm po dâng 4 hâi tơdế.

Mâu kăn Kuô̆k hô̆i têk kŏng tơbleăng vâ pơkâ thế Chin phuh rĕng pơtroh vâ ăm rơkong tơpui tối a hneăng hôp ôh tá tối hdrối, mê cho: séa ngăn kơxop hlá mơéa luât ki ‘mâi rơnêu, ‘mot tơ’nôm mâu tơdroăng 10 dêi luât; Tơdroăng tơkêa mơjiâng pro troăng prôk sap ing peăng kơnhŏng troh peăng Hdroh peăng mâ hâi lo hneăng hơnăm 2021 – 2025; Kơxop hlá mơéa pơkâ thế tíu ki pơkâ dêi mâu troăng hơlâ xiâm mơnhông pơlê kong kân Cần Thơ; tơdroăng pơkâ mơjiâng troăng hơlâ, liăn ngân vâ tŏng kum tơdrêng tơbleăng tơdroăng ‘mâi mơnhông ƀă mơdêk cheăng kâ rêh ối pơlê pơla.

Katarina Nga tơplôu ƀă tơbleăng